BTA bank offshorlyq kompanııaǵa 136 mln-nan astam dollardy kepildiksiz bergen

ASTANA. QazAqparat - Almaty qalasynyń qylmystyq ister jónindegi mamandandyrylǵan aýdanaralyq sotynda qashqyn bankır Muhtar Ábilázov pen onyń sybaılastarynyń qylmystyq isi boıynsha basty sot otyrysy odan ári jalǵasýda. Búgingi kezekti sot otyrysynda memlekettik aıyptaýshylar «BTA banki» AQ-nyń mıllıondaǵan qarajatyn jymqyrýǵa qatysty taǵy bir jańa epızodty jarııa etti.

2006 jyly Brıtan Vırgın araldarynda tirkelgen Muhtar Ábilázovtiń baqylaýyndaǵy «Rimos Ltd» kompanııasy arqyly «BTA banki» AQ-nyń shottarynan 136 mıllıonnan astam AQSh dollary urlanǵan. Brıtan Vırgın araldaryndaǵy kompanııa BTA bankten 136 mıllıonnan astam AQSh dollaryn eshqandaı kepildiksiz alǵany málim boldy. Bul týraly sot otyrysynda BTA banktiń ókili Talǵat Amantaı habarlady.

«Tirkelý rásimi júzege asyrylǵannan keıin «Rimos Ltd» kompanııasy «BTA banki» AQ-na 136 mıllıonnan astam AQSh dollary kóleminde bankilik qaryz berýge ótinish joldaıdy. Bul qarajatqa Reseı Federatsııasynyń Máskeý oblysynan jer ýchaskesin satyp alý, «Somerset Project Inc» kompanııasyn (taratyp aıtqanda «Chesterland Invest Corp» kompanııasynyń 100 paıyz aktsııasyn satyp alý josparlanǵan) qarjylandyrý, ınvestıtsııalyq shyǵyndardyń ornyn toltyrý kózdelgen bolatyn»,- dep áńgimeledi sotta «BTA banki» AQ-nyń ókili.

Onyń aıtýynsha, atalǵan kompanııany qarjylandyrýda eshqandaı da múlik kepildikke qoıylmaǵan. Esterińizde bolsa, buǵan deıingi sot otyrystarynyń birinde sotqa túsinik bergen birneshe kýáger rezıdent emes kompanııalardyń qujattarynyń barlyǵy osyndaı maqsat úshin arnaıy qurylǵan bólimde saqtalyp kelgenin aıtqan bolatyn. Ol bólim №6 korporatıvtik bıznes basqarmasy dep atalǵan. Kýágerler sotta bul basqarmanyń jumysyn tikeleı Muhtar Ábilázovtiń ózi baqylaýda ustaǵanyn rastady. Atap aıtarlyǵy, BTA bank Muhtar Ábilázovke tıesili offshorlyq kompanııalarǵa nesıelerdi eshqandaı múliktik kepildiksiz berip otyrǵan.

BTA bankte belgili bir bekitilgen normalar, qalyptasqan erejeler bolǵan. Alaıda sondaı bekitilgen normalarǵa qaramastan, Muhtar Ábilázov pen onyń uıymdasqan qylmystyq qaýymdastyǵy «Rimos Ltd» kompanııasyna BTA bankten 136 mıllıonnan astam AQSh dollaryn 2009 jyldyń jeltoqsan aıyna deıin jyldyq 14 paıyzdyq syıaqylyq mólsherlememen berýge sheshim qabyldaıdy. Aıtarlyǵy, bul nesıe bankke qaıtarylmaǵan. Sebebi mundaı nesıelerdiń barlyǵy qaıtarymsyz nesıe bolyp qala bergen.

«Odan áride Muhtar Ábilázovtiń tikeleı nusqaýymen atalǵan qarajat «Rimos Ltd» kompanııasynyń shotyna «Trasta Komercbank» (Latvııa - avtordyń eskertýi) arqyly aýdarylǵan. Sondaı-aq, kóp uzamaı offshorlyq shottarǵa shyǵarylǵan»,- dep málim etti sotta Talǵat Amantaı.

«BTA banki» AQ-y birneshe mıllıondaǵan valıýtalyq nesıeni bere otyryp, kepilzat esebinde Máskeý oblysyndaǵy jer ýchaskesin jáne «Chesterland Invest Corp» kompanııasynyń aktsııalaryn qoıýyna múmkindigi bolǵan. Alaıda mundaı áreket jasalmaǵan. Keıinirekte sot otyrysynda «Rimos Ltd», «Bexley Holding Sarl» sııaqty kompanııalardyń bir kúndik qana maqsat úshin qurylǵany málim boldy. Muhtar Ábilázov olardy zańdyq negizde nesıe berý degen jeleýmen ashyp, BTA banktiń qarajatyn urlaýmen aınalysqan.