Bishkekte ShYU múshe memleketter basshylarynyń XXII otyrysy ótip jatyr

<p>Bishkektegi &laquo;Ala-Archa&raquo; memlekettik rezıdentsııasynda Qyrǵyz Respýblıkasynyń tóraǵalyǵymen Shanhaı yntymaqtastyq uıymyna múshe memleketter basshylary Keńesiniń XXII jıyny ótip jatyr, dep habarlaıdy <a href="https://kaz.inform.kz/" target="_blank" rel="noopener">Kazinform</a> agenttiginiń menshikti tilshisi.</p>

Jıyn bastalmas buryn delegatsııa basshylarynyń amandasý jáne sýretke túsý rásimi boldy. Sodan keıin rezıdentsııa kongress-holynda qatysýshylar Qyrǵyz Respýblıkasynyń prezıdenti Sadyr Japarovpen kezdesedi. Ary qaraı Shanhaı yntymaqtastyq uıymyna múshe memleketter basshylarynyń keńeıtilgen otyrysy bastalady.

Jıynǵa Belarýs Respýblıkasynyń premer-mınıstri Roman Golovchenko, Iran Islam Respýblıkasynyń birinshi vıtse-prezıdenti Mohammad Mohber, Qazaqstan Respýblıkasynyń premer-mınıstri Álıhan Smaıylov, Qyrǵyz Respýblıkasy prezıdent ákimshiliginiń jetekshisi – mınıstrler kabınetiniń tóraǵasy Aqylbek Japarov, Qytaı Halyq Respýblıkasy Memlekettik Keńesiniń premeri Lı Tsıan, Mońǵolııa premer-mınıstri Lývsannamsraın Oıýýn-Erdene, Reseı Federatsııasy úkimetiniń tóraǵasy Mıhaıl Mıshýstın, Tájikstan Respýblıkasynyń premer-mınıstri Kohır Rasýlzoda, Ózbekstan Respýblıkasynyń premer-mınıstri Abdýlla Arıpov, Túrikmenstan mınıstrler kabıneti tóraǵasynyń orynbasary Hodjamyrat Geldımyradov, Úndistan Respýblıkasy Syrtqy ister mınıstri Sýbramanıam Djaıshankar jáne Pákistan Islam Respýblıkasy Syrtqy ister mınıstri Djalıl Abbas Djılanı qatysyp jatyr.

Kezdesý barysynda uıymǵa múshe elder arasyndaǵy yntymaqtastyq pen ózara qarym-qatynasty nyǵaıtýǵa qatysty ózekti máseleler qaralyp, saýda-ekonomıka jáne mádenı-gýmanıtarlyq salada birqatar qujatqa qol qoıylady dep josparlanǵan.

Qazirgi ýaqytta ShYU quramyna túrli dárejede kiretin memleketter:

9 múshe memleket – Úndistan Respýblıkasy, Iran Islam Respýblıkasy, Qazaqstan Respýblıkasy, Qytaı Halyq Respýblıkasy, Qyrǵyz Respýblıkasy, Pákistan Islam Respýblıkasy, Reseı Federatsııasy, Tájikstan Respýblıkasy, Ózbekstan Respýblıkasy.

3 el ShYU janyndaǵy baqylaýshy el dárejesine ıe – Aýǵanstan Islam Respýblıkasy, Belarýs Respýblıkasy, Mońǵolııa. 2022 jyly Shanhaı Yntymaqtastyq uıymynyń Samarqandaǵy Sammıtinde Belarýs Respýblıkasynyń dárejesin múshe memleketke deıin kóterý protsesi bastaldy.

14 memleket ShYU dıalogi boıynsha seriktes – Ázerbaıjan Respýblıkasy, Armenııa Respýblıkasy, Bahreın Koroldigi, Egıpet Arab Respýblıkasy, Kambodja Koroldigi, Qatar Memleketi, Kýveıt Memleketi, Maldıv Respýblıkasy, Mıanma Odaǵy Respýblıkasy, Nepal Federatıvtik Demokratııalyq Respýblıkasy, Birikken Arab Ámirlikteri, Saýd Arabııa Koroldigi, Túrik Respýblıkasy, Shrı-Lanka Demokratııalyq Sotsıalıstik Respýblıkasy.

26 qazanda Qyrǵyzstanda Táýelsiz Memleketter Dostastyǵy men Eýrazııalyq úkimetaralyq keńes basshylary jıyny ótkenin eske sala keteıik.

Qyrǵyzstan astanasynda resmı is-sharalar ótip jatqan kezde 4 myńǵa jýyq tártip saqshysy qoǵam qaýipsizdigin qamtamasyz etip jatyr. Bishkektegi oqý oryndarynyń bári onlaın-formatqa aýysty.