Bishkekte ShYU elderiniń halyqaralyq medıtsınalyq kongresi ótip jatyr

<p>BІShKEK. KAZINFORM &ndash; Bishkekte 27-29 naýryz aralyǵynda ótetin ShYU elderiniń halyqaralyq medıtsınalyq kongresi óz jumysyn bastady.</p>

Kongreske ShYU-ǵa múshe memleketterdiń densaýlyq saqtaý mınıstrlikteriniń ókilderi, ShYU-ǵa múshe memleketterden jáne basqa elderden kardıologııa, ishki jáne taý medıtsınasy salasyndaǵy jetekshi ǵalymdar men mamandar, jas ǵalymdar, joǵary oqý oryndarynyń ókilderi jáne ǵylymı uıymdardyń qyzmetkerleri, ShYU elderiniń ulttyq ǵylymı-medıtsınalyq ortalyqtarynyń ókilderi, sondaı-aq DDU qosa alǵanda, halyqaralyq uıymdardyń ókilderi qatysyp jatyr.

Іs-sharany ashqan Qyrǵyz Respýblıkasy Mınıstrler kabınetiniń tóraǵasy – Prezıdent Ákimshiliginiń basshysy Aqylbek Japarov densaýlyq saqtaý salasyn damytý Qyrǵyzstan úshin basym baǵyttardyń biri ekenin atap ótti. 

Foto: QR Densaýlyq saqtaý mınıstrligi baspasóz qyzmeti

«ShYU-ǵa múshe memleketterdiń qatysýymen ótetin mundaı aýqymdy kongress elderimiz arasyndaǵy medıtsınalyq yntymaqtastyqty tereńdetý jolyndaǵy alǵashqy qadam bolmaq. Elder arasyndaǵy yntymaqtastyq medıtsına ǵylymy men tájirıbesin damytýǵa, medıtsına mamandarynyń biliktiligin arttyrýǵa, sondaı-aq barlyq azamat úshin medıtsınalyq qyzmetterdiń qoljetimdiligi men sapasyn qamtamasyz etýge yqpal etetin mańyzdy ıntegratsııalyq qural», - dedi A.Japarov.

Qyrǵyz Respýblıkasynyń Densaýlyq saqtaý mınıstri Alymqadyr Beıshenalıev óz sózinde halyqaralyq yntymaqtastyq pen tájirıbe almasýdyń asa mańyzdylyǵyn atap ótti.

«Biz densaýlyq saqtaý salasyndaǵy mańyzdy máselelerdi talqylap, naqty is-sharalar josparyn ázirleý úshin jınaldyq. Júrek-qan tamyrlary jáne juqpaly emes aýrýlarmen kúresý – túrli elderdiń ókilderin osy ortaq maqsat biriktirgen. Bizdiń birligimiz ben bilim almasýymyz osy máselelerge qarsy kúreste qýatty qural bolatynyna senimdimin. Qyrǵyzstan kardıologııa, kardıohırýrgııa jáne ishki medıtsınada ǵylymı-zertteý qyzmetin jandandyrýǵa jáne zamanaýı ǵylymı klasterlerdi qurýǵa umtylýda. Bul dıagnostıka men emdeýdiń jańa ádisterin damytýǵa, medıtsınalyq tájirıbeniń tıimdiligin arttyrýǵa jáne ólim-jitim deńgeıin tómendetýge múmkindik beredi jáne, saıyp kelgende, biz halyqaralyq yntymaqtastyq pen tájirıbe almasýdyń asa mańyzdylyǵyn atap ótýimiz kerek», - dedi ol.

Densaýlyq saqtaý mınıstrliginiń málimetinshe, Qyrǵyzstanda 2021 jyly júrek-qan tamyrlary aýrýlarynan (JQA) ólim kórsetkishi 52,3%, al jalpy juqpaly emes aýrýlardan 80%-dan astam bolǵan. JQA-dan bolatyn ólim-jitim negizinen júrektiń koronarlyq aýrýy, sonyń ishinde mıokard ınfarkti, arterııalyq gıpertenzııa, júrek arıtmııasy jáne sozylmaly júrek jetkiliksizdiginen týyndaıdy.

Sarapshylar ólim-jitim men múgedektiktiń joǵary deńgeıine baılanysty júrek-qan tamyrlary jáne juqpaly emes aýrýlar Shanhaı yntymaqtastyq uıymyna (ShYU) múshe elderde de kúrdeli másele ekenin atap ótti.