Bishkekte Qurmanbek Bakıevtiń elge oralýyna qarsy mıtıng ótip jatyr

<p>Bishkektegi Maksım Gorkıı atyndaǵy saıabaqta 2010 jylǵy sáýir tóńkerisinen keıin qurylǵan qoǵamdyq birlestik músheleriniń mıtıngisi ótip jatyr, dep habarlaıdy <a href="https://kaz.inform.kz/" target="_blank" rel="noopener">Kazinform</a> agenttigi <a href="https://24.kg/proisshestvija/280681_vbishkeke_prohodit_miting_protiv_priezda_beglogo_prezidenta_kurmanbeka_bakieva/" target="_blank" rel="noopener">24.kg</a> resýrsyna silteme jasap.</p>

Jınalǵandar qashqyn prezıdent Qurmanbek Bakıevtiń ózin aqtap, Qyrǵyzstanǵa oralý úshin túrli áreketter jasap jatqanyn atap ótti.

Olardyń aıtýynsha, buǵan deıin prezıdent Sadyr Japarovqa «Aıkól Taza Koom» qoǵamdyq birlestiginiń jetekshisi Úsipbı Sherimbaevtyń atynan úndeý jiberilgen.

Hatta sáýir oqıǵasynyń qurbandary, jesirler men jetimderdiń atynan Qurmanbek Bakıevten aqshalaı ótemaqy talap etilgen.

«Úsipbı Sherimbaevtyń buǵan qandaı qaqysy bar? Ol túgili qıyn jaǵdaıǵa tap bolǵan jesir áıelder, jetimder, jalǵyz ulynan aıyrylǵan analar ótemaqy suraǵan joq. Bakıev halyqtyń qanyn tókti, memleketti tonady, elde qymbatshylyq bolsa da, onyń aram aqshasyn almaımyz», – dedi mıtıngige qatysýshylar.

Sherýshiler bılikten qýylǵan prezıdent Qurmanbek Bakıevtiń Qyrǵyzstanǵa kelýine úzildi-kesildi qarsy ekenin bildirdi.

Aıta keteıik, dál osyndaı narazylyq sharasy mamyr aıynda da ótken bolatyn.

Sodan keıin onyń qatysýshylary Qurmanbek Bakıevti qamaýǵa alýdy surady.

Esterińizge sala keteıik, qashqyn prezıdent Qyrǵyzstannyń Joǵarǵy sotynyń úkimimen 24 jylǵa bas bostandyǵynan aıyrylǵan.