Bishkek mektepterinde sabaqtyń bastalý ýaqyty ózgerýi múmkin

<p>BІShKEK. KAZINFORM &ndash; Qyrǵyzstan astanasynyń ákimdigi jol-kólik ınfraqurylymyndaǵy keptelisterdi azaıtý jáne balalardyń ómiri men densaýlyǵynyń qaýipsizdigin qamtamasyz etý maqsatynda mektepterde sabaqtyń bastalý ýaqytyn ózgertýdi usynyp otyr.</p>

Mektepterde sabaqty 8:00-den erte, al kásiptik lıtseıler men joǵary oqý oryndarynda saǵat 10:00-de bastaý usynylyp otyr. Tıisti qaýly jobasy qoǵamdyq talqylaýǵa shyǵaryldy.

Mýnıtsıpalıtettiń málimetinshe, ishki kóshi-qon aǵynynyń kóp bolýyna baılanysty qaladaǵy balalar sany jyl saıyn artyp keledi. Qazirgi tańda el astanasynyń 103 kommýnaldyq bilim berý mekemesinde 198 129 bala bilim alýda, olardyń jobalyq qýattylyǵy aýysymyna 89 893 oqýshy ornyn quraıdy.

Budan bólek, Bishkekte 129 kásiptik bilim berý uıymy bar, onyń ishinde 36 joǵary oqý orny, 77 orta kásiptik oqý orny jáne 16 kásiptik lıtseıde jalpy sany 167 727 oqýshy bar.

Ákimdiktiń habarlaýynsha, qala mektepteri oqýshylarǵa toly, joldar kólikterge shamadan tys júktelip, bilim berý uıymdarynda sabaqtyń bastalýy men aıaqtalýyna sáıkes keletin ýaqyt aralyǵynda keptelis ornaıdy.