Transkaspıı halyqaralyq kólik memorandýmy jasalady

<p>ASTANA. KAZINORM &ndash; Global Gateway kólik qatynasy jónindegi ınvestıtsııalyq forým aıasynda Brıýsselde Qazaqstan men Latvııa Respýblıkasynyń Kólik mınıstrleri Marat Qarabaev pen Kaspars Brıshkenstiń ekijaqty kezdesýi ótti. Bul týraly atalmysh mınıstrliktiń baspasóz qyzmeti málim etti.</p>

Taraptar kólik jáne óńirlik baılanys jónindegi birlesken jumys tobynyń róliniń mańyzdylyǵyn atap ótti, sondaı-aq azamattyq avıatsııa jáne avtokólik salasyndaǵy yntymaqtastyqty talqylady. Sonymen qatar mınıstrler Transkaspıı halyqaralyq kólik baǵytyn damytý boıynsha memorandým jasasý týraly sóılesti.

QR Kólik mınıstrliginiń basshysy latvııalyq ınvestorlardy ınfraqurylymdyq jobalardy birlesip iske asyrýǵa shaqyrdy.

«Jaqyn arada qazaqstandyq kólik kompanııalary men bıznes qurylymdarynyń qatysýymen men bastaǵan delegatsııanyń Baltyq elderine jumys sapary kútilýde, bul bizdiń kólik salasyndaǵy qarym - qatynasymyzdy nyǵaıtatynyna senimdimin, - dedi M.Qarabaev.

Foto: QR Kólik mınıstrliginiń baspasóz qyzmeti

Kaspars Brıshkens Qazaqstan men Latvııa arasyndaǵy saýda-ekonomıkalyq qatynastardy odan ári damytýǵa qyzyǵýshylyq bildirip, qol jetkizilgen ýaǵdalastyqtardy iske asyrýǵa jan-jaqty járdem kórsetýge daıyn ekenin bildirdi.

Kezdesý sońynda Marat Qarabaev Kaspars Brıshkens pen Latvııadan kelgen delegatsııany osy jyldyń 19-21 maýsymynda Astana qalasynda josparlanǵan New Silkway forýmyna shaqyrdy. Іs-shara Kólik jáne logıstıka salasyndaǵy halyqaralyq deńgeıdegi áriptestikti keńeıtýge baǵyttalǵan.