Brıýssel jasyl tehnologııalar men shıkizat boıynsha usynystar jasady

BRıÝSSELЬ. QazAqparat – Brıýssel Eýroodaq ekonomıkasyn jasyl tehnologııalarǵa kóshirý men taý-ken ónerkásibine qatysty eki usynys jasady. Bul – taza ónerkásip týraly jáne asa mańyzdy shıkizat týraly zańdar. Olar Jerdegi klımattyń ózgerýine jaýap bermeıtin salalarǵa ınvestıtsııa tartýǵa arnalǵan, dep habarlaıdy QazAqparat euronews.com-ǵa silteme jasap.

Eýropalyq komıssııanyń atqarýshy vıtse-tóraǵasy Frans Tımmermans bul ǵasyrdyń ortasyna qaraı parnıktik gaz shyǵaryndylary men ony beıtaraptandyrý arasyndaǵy aıyrmashylyqty joıýǵa kómektesetinin aıtty.

«Indýstrııanyń kómirtegi beıtaraptyǵy týraly zańyna sáıkes, ónimge degen qajettiliktiń kem degende 40%-yn Eýropada ornalasqan nysandar arqyly óteýdi maqsat etip otyrmyz. Árıne, syrtqy áriptesterimizben saýda-sattyqty jalǵastyramyz. Barlyǵy Eýropada óndirilmeıdi, biraq Eýropada kóbirek jasalýy kerek», - dedi ol.

Bul sharalar AQSh-ta jasyl bızneske memlekettik kómek kórsetýdi qarastyratyn ınflıatsııany tómendetý týraly zańnyń qabyldanýyna jaýap retinde engizilgen.

Eýrokomıssııa óz tarapynan qorshaǵan ortany lastamaıtyn salalardy sýbsıdııalaýǵa jol ashady. Onyń ishinde jel, kún jáne beıbit atom energııasyn paıdalaný, jylý sorǵylaryn ornatý, syıymdylyǵy joǵary akkýmýlıatorlar jasaý bar. Bul jobalardy iske asyrýdy jedeldetý úshin ákimshilik rásimderdi jeńildetý kózdelgen. Munyń bári EO-nyń Qytaı sııaqty jetkizýshilerden táýelsizdigin nyǵaıtýy tıis.

Sondaı-aq, Eýrokomıssııa EO-nyń elektronıka shyǵarýda paıdalanylatyn asa mańyzdy shıkizatqa qoljetkizýin jaqsartýdy kózdeıdi. 2030 jylǵa qaraı kontınentte sırek elementterdiń 10%-yn óndirý jáne Eýroodaqtyń olarǵa degen suranysyn 40%-ǵa óteý usynylady. Brıýssel EO ózge astanalarynan jetkizýshilerdi dıversıfıkatsııalaýdy talap etedi.