Brıýssel turǵyndaryna óz úıiniń energotıimdiligin arttyrýǵa nesıe beriledi

BRıÝSSELЬ. QazAqparat – Bıylǵy jyldyń 1 tamyzynan bastap Brıýssel turǵyndary óz úıiniń jóndeý jumystary úshin nesıeleýdiń jańa túrin paıdalana alady, dep habarlaıdy QazAqparat menshikti tilshisi.

Jergilikti BAQ-tyń jazýynsha, Brıýssel aımaqtyq turǵyn úı qorynyń «Ekoreno» (Ecoreno) dep atalatyn nesıelendirýdiń jańa baǵdarlamasynda ótinish berýshiniń tabysyna baılanysty 0-den 1% deıin paıyzdyq mólsherleme qarastyrylǵan. Qarjylandyrý turǵyn úılerdiń jylýdy ustap turý jaǵdaıyn jaqsartýǵa, sondaı-aq balamaly energııa kózderin ornatýǵa baǵyttalǵan.

«Elektr energııasyna tólemder sharyqtap bara jatqan qazirgi ýaqytta, Brıýsseldegi úı sharýashylyqtary óz baspanalarynyń energııa tıimdiligin jaqsartý múmkindigin alýy tıis», - dep túsindirdi turǵyn úı qurylysy jáne teń múmkindikter jónindegi stats hatshy Naval Ben Hamý «Bruzz» basylymyna.

Onyń aıtýynsha, energııa tıimdiligin arttyrý boıynsha mundaı jumystardy qunynyń joǵary bolýyna baılanysty halyqtyń edáýir bóligi júrgize almaıdy. Bul turǵyda nesıeleý belgııa qoǵamynyń kóptegen salasyn qamtýǵa múmkindik beredi.

Belgııanyń qorshaǵan ortany qorǵaý mınıstri Alen Maron ǵımarattardy jóndeý óńir úshin basty másele dep sanaıdy.

Belgııa úkimetiniń múshesi «Ecoreno» nesıesin Brıýsseldiń barlyq turǵyny úshin ádil jáne yntymaqtastyqqa negizdelgen energııa almasýǵa kepildik beretin mańyzdy shara retinde qarastyrady.

Foto: global-uploads.webflow.com