Brıýssel turǵyndary men qonaqtary qazaq mádenıetimen jaqynyraq tanysty
«Dıplomatııalyq ókildiktiń ǵımaratyna kireberiste kelýshiler qazaqstandyq fotograftar túsirgen elimizdiń qalalary men tabıǵatynyń, otandastardyń kúndelikti tirshiligin kórsetetin kólemdi fotosýrettermen tanysty. Eýropalyq odaq astanasynyń júzdegen turǵyndary men qonaqtary qazaq kıiz úıiniń jabdyqtarymen jáne elimizdiń baı mádenıeti men alýan túrli tabıǵatyn beıneleıtin kórmemen jaqynyraq tanysyp, dombyra únin tyńdap, qazaqtyń ulttyq kıimderin kıip, estelik sýretke tústi. Ataqty otandastarymyz – boksshy Gennadıı Golovkın men ánshi Dımash Qudaıbergenniń fotosýretteri de kópshiliktiń nazaryna ilikti. Qazaqstandyqtardyń qonaqjaılyǵyn jáne bizdiń dástúrli taǵamdarymyzdyń keremet dámin joǵary baǵalady», - dep jazdy QR Syrtqy ister mınıstrliginen .
Elshilik qonaqtary, onyń ishinde belgııalyq saıasatkerler, kásipkerler, dıplomattar, elimizdiń mýzykalyq ónerimen, eldiń týrıstik áleýeti, qazaqstandyq seriktestermen iskerlik baılanystardy ornatý jáne nyǵaıtý múmkindikteri týraly suraqtar qoıdy. Keıbireýleri Álemdik jáne dástúrli dinder lıderleriniń VII sezine qatysý úshin Rım Papasy Frantsısktiń jaqynda Astanaǵa jasaǵan memlekettik sapary arqyly Qazaqstanǵa qyzyǵýshylyq tanytqanyn aıtyp, qazirgi álemde dıalog pen ózara túsinistik mádenıetin nyǵaıtýǵa baǵyttalǵan osyndaı bastamalardyń ózektiligin atap ótti.
Jyl saıyn qyrkúıektiń ortasynda atap ótiletin «Eýropalyq muralar kúnderine» alǵash ret qatysqan Qazaqstannyń Brıýsseldegi Elshiligi Belgııa men Eýroodaqtyń astanasynda elimizdiń baı mádenıetin, týrıstik jáne ınvestıtsııalyq áleýetin tanystyrý maqsatyndaǵy belsendi jumysyn jalǵastyrýda.
Foto : gov.kz