Brıýsselde júgirýden jyl saıyn ótetin jarysqa 40 myńnan astam áýesqoı sportshy jınaldy

BRıÝSSELЬ. QazAqparat - Belgııa astanasynda jyl saıynǵy «Brıýssel 20 shaqyrym» sporttyq sharasy ótti, dep habarlaıdy QazAqparat tilshisi.

20 shaqyrymdyq jarys - jartylaı marafon emes, biraq Belgııa astanasy úshin mańyzdy oqıǵa. Bıyl 43-shi ret uıymdastyrylyp otyrǵan sharaǵa oraı Brıýssel kósheleriniń kópshiligi jabyldy.

Shara Belgııa táýelsizdiginiń 50 jyldyǵy saıabaǵynan bastaldy. Ary qaraı marafonǵa qatysýshylar Belgııa astanasynyń tarıhı bóligi sanalatyn Eýropalyq kvartaldy kesip ótip, Brıýsseldiń «Bois de Cambre» saıabaǵy arqyly máre syzyǵyna shyǵýy kerek.

Jarys jolynda uıymdastyrýshylar sporttyq is-sharaǵa qatysýshylardy sý jáne salqyn sýsyndarmen qamtamasyz etý pýnktterin qarastyrdy. Ol úshin uıymdastyrýshylarǵa myńnan astam erikti kómektesti.

Uıymdastyrýshylardyń aıtýynsha, bıyl jarysqa qatysý úshin 40 myńnan astam qatysýshy tirkelgen. Onyń ishinde 33 myńnan astamy - áýesqoı júgirýshi, 5,6 myńy - jaıaý júrginshi jáne 1,2 myńy - múmkindigi shekteýli jandar.

Belgııanyń Premer-Mınıstri Aleksandr De Kroo qatysýshylardyń birinshi tobyn ózi jóneltti. Sportshylardyń ekinshi legin qala meri Fılıpp Kloýz qashyqtyqqa «jiberdi». Úshinshi kezektegi «start» komandasyn Eýropalyq parlament tóraǵasy Roberta Metsola berdi.

Jarysqa qatysýshylardyń baǵyty Belgııa astanasynyń kórikti jerleri arqyly ótti.

Atalmysh jarysqa qatysýshylar arasynda Belgııada turyp, jumys isteıtin qazaqstandyqtar da boldy.

Otandastarymyz mundaı sporttyq sharalarǵa únemi qatysyp, salaýatty ómir saltyn ustanýǵa tyrysatyndaryn atap ótti.

Jarys sońynda uıymdastyrýshylar ár qatysýshyǵa sporttyq sharaǵa qatysqany úshin estelik medal tabystady.