Brıýsselde Qazaqstannyń Eýroodaqpen yqpaldastyq máselesi talqylandy

BRıÝSSELЬ. QazAqparat - Bedeldi jalpyeýropalyq «Euractiv» basylymynyń alańynda «Eýroodaq Ortalyq Azııadaǵy kún tártibin qalaı ilgeriletedi - Qazaqstannyń óńiraralyq yntymaqtastyqtaǵy róli» taqyrybynda dóńgelek ústel ótti, dep habarlaıdy QazAqparat tilshisi.

Dóńgelek ústel barysynda qatysýshylar Eýropalyq Odaq pen Ortalyq Azııa elderi arasyndaǵy kópjaqty yntymaqtastyqtyń ózekti aspektileri boıynsha sóz qozǵady. Aımaqtaǵy bes memlekettiń Eýropamen qazirgi qarym-qatynasy týraly qyzyqty pikir almasýlar men baǵalaýlar boldy.

Dóńgelek ústeldiń qorytyndysy týraly «QazAqparatqa» suhbat bergen EO janyndaǵy QR Turaqty ókiliniń orynbasary T.Sultanǵojın aǵymdaǵy jyldyń 2 maýsymynda Qyrǵyzstanda ótken Ortalyq Azııa memleketteriniń basshylary men Eýropalyq Keńestiń prezıdenti Sharl Mıshel kezdesýiniń qorytyndylaryna erekshe nazar aýdarylǵanyn atap ótti.

«Búgin Brıýsselde qyzyqty pikir almasý boldy. Qazaqstan óz tarapynan Ortalyq Azııadaǵy jáne Eýropalyq Odaqtaǵy kórshilerimen qarym-qatynasty nyǵaıtýǵa múddeli ekenin bildirdi. Bizdiń basymdyqtarymyz belgilendi. Shara óte sátti ótti dep oılaımyn», - dedi T.Sultanǵojın.

Dóńgelek ústel barysynda Eýrokomıssııanyń ókili P. Ýstýbs Qazaqstan men EO arasynda elimizdiń azamattary úshin vızalyq rejımdi jeńildetý múmkindigi boıynsha júrgizilip jatqan konsýltatsııalar ekijaqty qarym-qatynastardaǵy oń jańalyq bolyp tabylatynyn atap ótti.

Osyǵan qaramastan, eýropalyq ókil bul másele boıynsha Eýropalyq Odaqqa múshe barlyq elderdiń ustanymdaryn úılestirýge baılanysty eleýli jumys kútip turǵanyn atap ótti.