Brıýsselde Qazaqstan-Eýropa qatynastary talqylanady

ASTANA. QazAqparat – QR Syrtqy ister mınıstriniń orynbasary Roman Vasılenko Eýropa Keńesi basshylyǵymen kezdesedi. Bul týraly elordada ótken baspasóz máslıhatynda Syrtqy ister mınıstrliginiń resmı ókili Aıbek Smadııarov málim etti, dep habarlaıdy QazAqparat tilshisi.

«2023 jylǵy 23-25 qańtarda QR Syrtqy ister mınıstriniń orynbasary Roman Vasılenkonyń Brıýssel (Belgııa) jáne Strasbýrg (Frantsııa) qalalaryna sapary ótedi. Brıýsselge jumys sapary aıasynda Eýropa ınstıtýttarynyń joǵary laýazymdy ókilderimen birqatar ekijaqty kezdesýler josparlanǵan», - dedi A. Smadııarov.

Onyń aıtýynsha, Strasbýrgte Eýropa Keńesi Parlamenttik assambleıasynyń qysqy sessııasy aıasynda R.Vasılenkonyń Eýropa Keńesi men Eýropanyń Parlamenttik assambleıasy basshylyǵymen kezdesýleri ótedi.

«Sapardyń negizgi maqsattarynyń qatarynda Qazaqstan-Eýropa qatynastarynyń barlyq spektrine sholý jasaý, ózekti óńirlik jáne halyqaralyq problemalar boıynsha pikir almasý, sondaı-aq eýropalyq áriptesterdi elimizdegi saıası reformalardyń iske asyrylý barysy týraly, saılaý qorytyndylary jáne 2023 jylǵy 19 naýryzǵa josparlanǵan QR Parlamenti Májilisi depýtattaryn saılaý daıyndyǵymen tanystyrý qamtylǵan», - dedi resmı ókil.

Budan buryn habarlanǵandaı, 2023 jylǵy 23-24 qańtarda Tashkent qalasynda Ekonomıkalyq yntymaqtastyq uıymynyń Syrtqy ister mınıstrleri keńesiniń 26-shy otyrysy ótedi. Іs-sharaǵa QR Premer-Mınıstriniń orynbasary – Syrtqy ister mınıstri Muhtar Tileýberdi qatysady.