Brıýsselde Eýroodaqtyń Ortalyq Azııa boıynsha jańa strategııasy talqylandy

BRıÝSSELЬ. QazAqparat - Brıýsselde «Eýropalyq Odaq - Ortalyq Azııa» kezekti kezdesýi ótti. Basqosýǵa Qazaqstan, Qyrǵyzstan, Ózbekstan, Tájikstan, Túrkimenstannyń syrtqy saıası vedomstvo basshylary jáne Eýropalyq Odaqtyń Syrtqy saıasat jáne qaýipsizdik jónindegi joǵarǵy ókili qatysty, dep habarlaıdy QazAqparat.

Kún tártibinde - Eýropalyq Odaqtyń Ortalyq Azııa boıynsha jańa strategııasynyń jobasy. Qazaqstan SІM basshysy Qaırat Ábdirahmanovtyń pikirinshe, búginde Ortalyq Azııa - mańyzdy strategııalyq óńirde ornalasqan, eleýli adamı jáne úlken jıyntyq ekonomıkalyq áleýetke ıe, tabıǵı jáne óndiristik resýrstarǵa baı, álemniń qarqyndy damyp kele jatqan aımaqtarynyń biri.

Qazaqstan Eýropalyq Odaqpen óńiraralyq yntymaqtastyqqa erekshe mán beredi jáne ony óńirdiń turaqty damýyn qamtamasyz etý quraldarynyń biri retinde qarastyrady. Osy rette jańa Strategııany qalyptastyrý jınaqtalǵan tájirıbeni eskere otyryp,qujattyń naqty nátıjelerin arttyrýǵa múmkindik beretin erekshe sát bolyp tabylady, delingen Qazaqstan syrtqy saıası vedomstvo basshysynyń baıandamasynda.

Óz usynystarynda qazaqstandyq tarap bilim berý arqyly adamı kapıtaldy damytýǵa, zań ústemdigin jáne joǵary sapaly memlekettik basqarýdy ilgeriletýge, jeke kásipkerlikti, shaǵyn jáne orta bıznesti, onyń ishinde áıelder kásipkerligin damytýǵa erekshe nazar aýdarǵan.

Qazaqstandyq delegatsııanyń pikirinshe, Ortalyq Azııanyń jahandyq ekonomıkalyq protsesterge qosylýy, jańa tehnologııalyq ómir saltyn jáne tsıfrovızatsııa elementterin engizý, kólik-logıstıkalyq ınfraqurylymdardy jaqyndastyrý, energııa tıimdiligin arttyrý jáne «jasyl» tehnologııalardy engizý boıynsha eki óńirdiń tyǵyz áriptestigin talap etedi. Qorshaǵan ortany qorǵaý jáne sý resýrstaryn tıimdi paıdalaný, sondaı-aq Aýǵanstandy qalpyna keltirýge jáne turaqtandyrýǵa birlesken kómek kórsetý máselesi de asa mańyzdy. Qazaqstandyq tarap osy jáne basqa da sharalardyń qujatta eskerilýi qajet dep esepteıdi.

Sondaı-aq, Q. Ábdirahmanov qatysýshylardy Prezıdent N. Nazarbaevtyń «Uly dalanyń jeti qyry» maqalasynyń negizgi tustarymen tanystyryp, Qazaqstanda kópǵasyrlyq tarıhı murany jandandyrýǵa jáne arhıvtik, arheologııalyq jáne ózge de málimetterdi tsıfrlyq órkenıet jaǵdaıynda azamattardyń túsinýi men qoldanýyna qolaıly etýge baǵyttalǵan iri jobalar iske qosylatynyn habarlady.

Osy jobalardyń sheńberindegi birlesken jumys OA men EO arasyndaǵy óńiraralyq áriptestiktiń mádenı-gýmanıtarlyq baǵytyn baıytatyny atap ótildi.

Sondaı-aq, EO-Ortalyq Azııa formatynyń eýrazııalyq keńistiktegi iri ekonomıkalyq jobalarmen, atap aıtqanda, Eýrazııalyq ekonomıkalyq odaqpen jáne «Beldeý jáne jol» bastamasymen seriktestigi Ortalyq Azııany jahandyq ekonomıkalyq qatynastardyń mańyzdy qatysýshysyna aınaldyrady. Mınıstr qajet bolǵan jaǵdaıda, Astana EO - EAEO - QHRózara is-qımyl týraly dıalogyn bastaý alańyn qamtamasyz etýge ázir ekendigin habarlady.

Qujattyń keleshektegi iske asyrylýyna toqtala otyryp, Q.Ábdirahmanov úsh negizgi elementti: EO-OA formatyndaǵy yntymaqtastyqtyń tutastyǵyn qamtamasyz etý, Strategııany praktıkalyq iske asyrý úshin neǵurlym ıkemdi quraldardy qalyptastyrý, sondaı-aq onyń kórneki qabyldaýyn kúsheıtý qajettigine nazar aýdardy.

Máselen, sońǵysyn júzege asyrý úshin, Qazaqstan áriptestikti «vırtýaldy ınstıtýtsıonalızatsııalaýdy» qamtamasyz etetin jáne Ortalyq Azııanyń 70 mln halqyna birtutas onlaın-portal qurýdy usyndy.

Plenarlyq sessııanyń qorytyndysy boıynsha, taraptar «eki óńir arasyndaǵy ózara tıimdi, naqty jáne uzaq merzimdi paıdaǵa negizdelgen qarym-qatynasty damytý úshin» jańa strategııany 2019 jyldyń basynda qabyldaý qajettigin erekshe atap ótetin birikken kommıýnıke qabyldady.