Brýtsellezdi anyqtaý jumystary búkil tabynǵa júrgiziletin bolady - mınıstr

NUR-SULTAN. QazAqparat - Bıyl veterınarııalyq is-sharalarǵa 45 mlrd teńge bólindi. Bul týraly búgin Úkimet otyrysynda veterınarlyq jáne fıtosanıtarlyq qaýipsizdik máseleleri týraly baıandaǵan Aýyl sharýashylyǵy mınıstri Saparhan Omarov aıtty, dep habarlaıdy QazAqparat tilshisi.

«2019 jylǵa arnalǵan veterınarlyq is-sharalardy qarjylandyrý kólemi 45,2 mlrd teńgeni qurady. Bul ótken jylmen salystyrǵanda 2,9 mlrd teńgege artyq. Atalǵan qarajat esebinen 2019 jyly janýarlar men qustardyń asa qaýipti 17 aýrýyna qarsy vaktsınatsııalaý boıynsha 137,2 mln manıpýlıatsııa júrgizý josparlanǵan. Bul lısterıoz boıynsha salamattylyqqa qol jetkizýge baılanysty 2 mln manıpýlıatsııaǵa azaıtyldy. Sonymen qatar 13,9 mln bas aýyl sharýashylyǵy janýarlarynyń tólin birdeılendirý, janýarlardyń 28 asa qaýipti aýrýy boıynsha 72,4 mln zertteý júrgizý, zerthanalyq zertteýler úshin 34,8 mln qan synamasyn alý josparlanǵan», - dedi mınıstr.

Onyń aıtýynsha, Halyqaralyq epızootııalyq bıýro usynymdaryna sáıkes brýtsellezge qarsy kúres strategııasy qaıta qaraldy. Endi veterınarlyq is-sharalar brýtsellezge zertteý kezinde oń nátıje bergen janýarǵa ǵana emes, búkil tabynǵa júrgiziledi.

«Joǵary patogendi qus tumaýyna qarsy kúres strategııasyna jumys istep turǵan qus fabrıkalarynan 20 shaqyrym radıýstaǵy halyq sharýashylyǵynyń táýekel aımaǵyn anyqtaý bóliginde ózgerister engizildi. Endi jabaıy qustardyń qonys aýdarý jolynda jáne sý qoımalarynyń janynda ornalasqan sharýashylyqtarmen qatar qus fabrıkalaryndaǵy qustardyń da ata-enelik tabynyna osy aýrýǵa qarsy vaktsına egiletin bolady», - dedi ol.

Mınıstr dereginshe, sibir jarasy boıynsha jyl saıyn 100 paıyz qamtı otyryp, sezimtal janýarlarǵa aldyn ala vaktsınatsııalaý júrgiziledi. Halyqaralyq zerthanalarda olardyń sapasyn teksere otyryp, qoldanylatyn vaktsınalardyń sapasyn baqylaý kúsheıtildi. 2017-2018 jyldary kadastrmen belgilengen sibir jarasynyń 2180 kómindisi qorshaldy jáne taný belgilerimen belgilendi.