Birinshi lıgaǵa túsip qalǵan «Aqsý» komandasy jańa maýsymda Premer-lıgada oınaıdy

<p>ASTANA. KAZINFORM - Fýtboldan 2024 jylǵy Qazaqstan Premer-lıgasyna qatysatyn komandalardyń tolyq tizimi belgili boldy.&nbsp;</p>

Búgin 2024 jylǵy fýtboldan Qazaqstan chempıonatynyń tolyq qatysýshylary belgili boldy. Bıyl Premer-lıgada synǵa túsýge múmkindigi bolǵan «Maqtaaral» fýtbol klýbynyń ornyn «Aqsý» komandasy basty. 

Eske salsaq, Túrkistan oblysynyń ujymy fýtbol klýbtaryn lıtsenzııalaý jónindegi erejeniń talaptaryn oryndamaǵany jáne talapqa saı kelmegendigi úshin dop dodasynan shettetilgen edi. 

«Klýbtardyń básekege qabilettiligin saqtaý jáne chempıonattyń sapasyn arttyrý maqsatynda Qazaqstan Kásipqoı fýtbol lıgasy Premer-lıgaǵa qatysýshylar sanyna ózgerister engizbeýdiń mańyzdylyǵyna nazar aýdardy. Atap aıtqanda, sońǵy úsh jylda Premer-lıgada 14 klýbpen ótkizý formaty óziniń mańyzdylyǵyn dáleldedi. Ol oıyn kúntizbesin ıkemdi jáne josparlaýǵa múmkindik berdi. Sondaı-aq atalǵan format qatysýshylarǵa joǵary dıvızıonda óner kórsetý úshin joǵary sáıkestik talaptaryn belgiledi. Nátıjesinde fýtbol klýbtarynyń damýyna oń áser etti», - dep málim etti Qazaqstan Kásipqoı fýtbol lıgasynan.

QFF-da ótken fýtbol klýbtaryn lıtsenzııalaý jónindegi komıssııa otyrysynyń qorytyndysy boıynsha «Aqsý» fýtbol klýbyna ruqsat berý týraly sheshim qabyldandy. 

«Sporttyq qaǵıdatty saqtaý maqsatynda chempıonattyń jańa maýsymyna qatysý týraly usynys birinshi lıga klýbtaryna jáne ótken jyldyń qorytyndysy boıynsha Premer-lıgada sońǵy oryndarǵa jaıǵasqan úsh klýbqa jiberildi. Nátıjesinde «Aqjaıyq», «Han Táńiri», «Arys»,«Túrkistan»,«Taraz» jáne «Oqjetpes» klýbtary qatysýdan bas tartty. Sondaı-aq «Kaspıı» klýbynda sáıkessizdikter anyqtaldy. Al «Qyran» komandasy usynysqa jaýap bermedi», - dep tolyqtyrdy Qazaqstan Kásipqoı fýtbol lıgasynan.

Aıta ketsek, pavlodarlyq «Aqsý» 2022 jyly Premer-lıganyń debıýttik maýsymynda 6-oryndy ıelendi. Al ótken jyly chempıonatty sońǵy 14-orynda aıaqtady.