Birlik kúni: Aqtóbede qazaq tilinde jetik sóıleıtin polıtsııa qyzmetkerleri marapattaldy
«Bir shaqyraq astynda» atty sharaǵa túrli bólimde qyzmet etip júrgen polıtsııa qyzmetkerleri qatysty. Ásirese qazaq tilin jetik meńgergen ózge ult ókilderiniń eńbegi zor.
— Polıtsııa departamentinde de ózge ult ókilderi bar. Olar kún-tún demeı elimizdiń, halyqymyzdyń tynyshtyǵyna úles qosyp júr. Sý tasqyny kezinde ultqa bólinbeı, qyzmetke bólinbeı bárimiz atsalystyq. Bári aýyzbirshiliktiń arqasy dep aıtýǵa bolady, — dedi Aqtóbe oblystyq PD bastyǵy Abaı Júsipov.
Birlik kúni barlyǵy 8 polıtsııa qyzmetkeri marapattaldy. Olarǵa Alǵys hat berildi.
— Bir shańyraq astyndaǵy dostyq pen ózara túsinistik odan ári jalǵasyp, elimizdegi ultaralyq tatýlyq árdaıym berik bolsyn deımin. Ózim qazaq tilin jetik bilemin. Al polıtsııa qyzmeti salasynda eńbek etip júrgenime 10 jyl boldy. Bos ýaqytta sportpen shuǵyldanamyn ári qazaq tilinde óleń shyǵaramyn, — dedi Aqtóbe qalalyq polıtsııa basqarmasy patrýldik polıtsııa batalonynyń shtab ınspektory Sofııa Ponomareva.
Aqtóbelik polıtsııa qyzmetkerleri til úırenýdiń ózindik tásili men qyzyqty sátterin de bólisti. Máselen Zaýyt polıtsııa bólimi Jergilikti polıtsııa basqarmasy qyzmetiniń ınspektory Olga Andrııchýk joǵary oqý ornyna túskende qazaqsha múlde sóıleı almaǵan. Al áriptesi kerisinshe, orys tilin túsinbegen soń oqytýshylary eki ult ókilin qatar otyrǵyzǵan. Arada tórt jyl ýaqyt ótkende Olga Andrııchýk memlekettik tildi jetik meńgerip shyqty.
— Men qazaqsha erkin sóıleı bastadym. Bul úlken jetistik. Úzdik túlek bolǵan soń maǵan qyzmet etetin bólimdi tańdaýǵa múmkin berdi. Sol sebepten de Zaýyt polıtsııa bólimine bardym. Ózim qazaq tilinde án shyrqaǵandy da unatamyn, — dedi Olga Andrııchýk.