Birikken Arab Ámirlikteri Qazaqstanda ámbebap bank ashpaqshy

<p>ASTANA. KAZINFORM &ndash; Qarjy naryǵyn retteý jáne damytý agenttiginiń tóraǵasy Mádına Ábilqasymova Májilistiń jalpy otyrysynda Birikken Arab Ámirlikteriniń kommertsııalyq banki Qazaqstanda ámbebap bank ashýdy josparlap otyrǵanyn aıtty.</p>

Zańnamaǵa qarjy naryǵynda tutynýshylardyń quqyqtaryn qorǵaý máseleleri boıynsha ózgerister men tolyqtyrýlar engizýge arnalǵan zań jobasyn tanystyrǵan agenttik basshysy dál qazir elimizde úsh halyqaralyq bank óz fılıalyn ashyp jatqanyn aıtty.

«Sheteldik bankterdi Qazaqstan naryǵyna ákelý úshin biz elimizben tyǵyz ekonomıkalyq qarym-qatynasy bar memleketterdi zerttedik. Birinshiden, ol Azııa memleketteri, arab memleketteri, Túrkııa, Qytaı, Eýropalyq odaq memleketteri. Qazir úsh halyqaralyq qarjy toby Qazaqstanda bank ashý týraly sheshim qabyldady. Maýsym aıynda Ońtústik Koreıanyń BNK Financial Grou deıtin qarjylyq tobymen jumys istedik. Onyń aktıvteri shamamen 135 mlrd dollar bolady. Olar Qazaqstanda úsh jyl buryn shaǵyn nesıe ortalyǵyn ashqan. Endi sol uıymǵa lıtsenzııa almaqshy. Maýsym aıynda ruqsat berdik», - dedi ol.

Mádına Ábilqasymova qalǵan eki bank arab elderinen keletinin aıtty.

«Jaqynda Qatar memleketiniń banki «Báıterekten» Bereke bankti satyp aldy. Qatar Investment Authority degen úlken holdıng bar. Sonyń quramyndaǵy bank bizdiń bank sektoryna kirmekshi. 
Birikken Arab Ámirlikteriniń qarjy naryǵyn retteýshilerimen kezdesip, bank ókilderime jolyqty. Ol elde ADCB Bank degen bar. Aktıv kólemi boıynsha ámirlikterdegi úshinshi iri bank bolyp esepteledi. Qazir Qazaqstanda ıslamdyq qarjy operatsııalaryn jasaıtyn bank bar. Osy bank ámbebap lıtsenzııa almaqshy», - dedi ol.