Birqatar elmen Qazaqstannan barǵan jumysshylardyń quqyǵyn qorǵaý kelisimderi bekitilmek
«Qazaqstannan kelgen eńbek mıgranttarynyń eńbek jáne áleýmettik quqyqtaryn qamtamasyz etý maqsatynda Túrkııa, Birikken Arab Ámirlikteri, AQSh, Ulybrıtanııa, Ońtústik Koreıa, sondaı-aq Izraılmen kelisimder jasasý jumystary jalǵasyp jatyr. Bul qujattar osy elderdegi Qazaqstan azamattarynyń eńbek qyzmeti máselelerin retteıdi. Qazirgi kezde «Qazaqstan Respýblıkasynyń Úkimeti men Qatar memleketiniń Úkimeti arasyndaǵy Qazaqstannan kelgen jumysshylardy Qatarda jumysqa ornalastyrýdy retteý týraly kelisimge qol qoıý týraly» QR Úkimetiniń qaýlysy qabyldandy», - dedi A.Ertaev Ortalyq kommýnıkatsııalar qyzmetindegi baspasóz máslıhatynda.
Onyń aıtýynsha, buǵan qosa, Qazaqstan azamattarynyń sheteldegi eńbek qyzmetin uıymdastyrý bóliginde jumyspen qamtýdyń jekeshe agenttikteriniń qyzmetin retteý tetikteri qaıta qaralyp jatyr.
«Almaty, Shyǵys Qazaqstan jáne Túrkistan oblystarynda qazaqstandyqtardy saparǵa deıin oqytýǵa arnalǵan ortalyqtar quryldy. Onyń negizgi mindeti – shetelde jumysqa ornalasqysy keletin kandıdattardy tildik kýrstardan ótkizý, kásibı biliktiligin arttyrý», - dedi vıtse-mınıstr.
Óz kezeginde QR Eńbek jáne halyqty áleýmettik qorǵaý mınıstrligi Kóshi-qon komıteti tóraǵasynyń orynbasary Erbolat Abýlhatın elimizdiń azamattary kóbinese Reseı, Ońtústik Koreıa, Túrkııa jáne BAÁ-de jumys istep jatqanyn aıtty. Bıyl 135 myń qazaqstandyq shetelde jumys istep júr.