Brıtanııalyqtar qymbattaǵan elektr jaryǵy men gaz úshin ótemaqy alady

NUR-SULTAN. QazAqparat - Osy kúzde Ulybrıtanııadaǵy árbir úı sharýashylyǵyna gaz jáne elektr energııasy úshin 400 fýnt kóleminde jeńildik beriledi, dep habarlaıdy QazAqparat VVS-ge silteme jasap.

Eldiń qarjy mınıstri Rıshı Sýnaktyń aıtýynsha, eń kedeı otbasylarǵa 650 fýnt sterlıng tólenedi.

Sarapshylar energııa baǵasynyń odan ári ósýi múmkin dep boljap otyr. Jyl sońyna deıin mıllıondaǵan brıtandyq azamattyń bul ósimdi qaltasy kótere bermeıdi.

Jalpy somasy 15 mlrd fýnt bolatyn jańa sharalar paketi sońǵy aılarda kúrt ósken munaı-gaz kompanııalarynyń kútpegen kiristerine 25 paıyzdyq salyq esebinen ishinara qarjylandyrylatyn bolady.

Úkimet sondaı-aq zeınetkerler men múgedekterge kómek kórsetedi.

Osy aptanyń basynda Ulybrıtanııanyń Ofgem energetıkalyq retteýshisi qazan aıynda úı sharýashylyqtary úshin gaz ben elektr energııasynyń ortasha mólsheri 800 fýntqa ósip, jylyna 2800 fýnt sterlıng bolatynyn málimdedi. Sáýir aıynda shottar orta eseppen 700 fýntqa ósti.