Brıtanııalyq tájirıbe: Las aqsha aınalymymen kúresý joldary

LONDON. QazAqparat - Ulybrıtanııada qylmystyq jolmen kelgen kiristerin zańdastyrǵysy keletinder qatań jazalanady. Dáýlettiler baılyǵynyń qaıdan kelgenin túsindire almasa, zań aldynda jaýap berýi kerek. Qıturqy jolmen baıyp ketkenderdi Tumandy Albıon bıligi qalaı júgendeıtinin QazAqparat tilshisi zerttep kórdi.

Ulybrıtanııada bir kúnde bankten esep-shot ashý múmkin emes. Qarjylyq ınstıtýt jańa klıentin bir apta kóleminde jiti tekseredi. Óıtkeni, onyń las aqsha aınalymyna qatysy bolýy múmkin. Qylmystyq jolmen kelgen kiris týraly zań talaptary qatań.

«Aqshanyń shyǵý tegin jasyrǵandar bas bostandyǵynan aıyrylyp, kóp kólemde aıyppul arqalaıdy. Qylmys aýyr bolǵan jaǵdaıda, aıyptalýshy 14 jylǵa deıin sottalýy múmkin. Onyń shottary buǵattalady jáne qarajaty tárkilenedi. Aıyppuldyń kólemin sýdıa anyqtaıdy», - deıdi zańger Adrıan Eıssa.

Tumandy Albıonda aqshanyń izin jasyrý ulttyq qaýipsizdikke qaýip tóndirýmen teń. Óıtkeni, las aqsha terrorızmdi qarjylandyrýǵa jumsalýy múmkin. Іshki ister mınıstrliginiń málimetinshe, Ulybrıtanııada shyǵý tegi beımálim qarajattyń kólemi jylyna 90 mlrd fýntqa deıin jetedi eken.

«Banktiń nemese ınvestıtsııalyq kompanııanyń qyzmetkeri barlyq kúdikti operatsııalar boıynsha qadaǵalaýshy organǵa esep berip otyrýǵa mindetti. Talap oryndalmaǵan jaǵdaıda, 7 jylǵa deıin bas bostandyǵynan aıyrylýy jáne aıyppul tóleýi múmkin», - deıdi qarjy sarapshysy Tonı Danjel.

Óz elininiń qazynasyna qol salyp, halqyn tonaǵan urylardyń kópshiligi baılyǵynyń izin jasyrý úshin, ádette Ulybrıtanııa astanasyna asyǵady. Kleptokrattar Londonǵa kelip, ondaǵan mıllıon sterlıng fýntyna baǵalanatyn záýlim saraılar satyp alady. Biraq tikeleı emes, ofshorlyq aımaqtarda ornalasqan kompanııalardyń jáne tájirıbeli zańgerlerdiń kómegimen, árıne. Nátıjesinde jyljymaıtyn múlik ıesiniń kim ekenin anyqtaý múmkin bolmaı qalady.

«Úlken úı-jaılarǵa kóbine reseılik, malaızııalyq, taılyq, nıgerııalyq jáne taıvandyq mıllıarderler ıelik etedi degen pikirler aıtylyp júr. Aralarynda qazaqstandyqtar da bolýy múmkin. Biraq olardyń esimderi eshbir jerde resmı aıtylmaıdy. London - las aqshanyń izin jasyrýdyń álemdik ortylyǵyna aınalǵandaı», - deıdi London korol kolledji ýnıversıtetiniń professory Patrık Boıl.

Ótken jyldyń ekinshi jartysynda Ulybrıtanııanyń Salyq jáne keden komıteti zań talaptaryn oryndamaǵan 240 kásiporynǵa shara qoldanypty. Olarǵa barlyǵy 3 mıllıonnan astam sterlıng fýnty kóleminde aıyppul salynǵan.