Brıtanııada «Týr de Frans» velokópkúndigi bastaldy
09:50, 05 Shilde 2014
ASTANA. QazAqparat - Kásibı velosportta bedeldi saıystyń biri sanalatyn «Týr de Frans» velokópkúndigi óz tarıhyndaǵy 101-shi jarysyn búgin Brıtanııanyń Lıds qalasynda bastady.
Velobáıge 27 shilde kúni Parıjde Elıseı alańynda márege jetedi.
«Týr de Frans-2014»-ke barlyǵy 22 komanda qatysady. Úsh apta aıasynda 219 veloshabandoz 15, 21 shilde demalys kúnderin qosqanda jarystyń 21 kezeńinde barlyǵy 3 663,5 shaqyrymdy júrip ótýi kerek.
Alǵashqy úsh kezeń Ulybrıtanııa aýmaǵynda bolyp, 7 shilde kúni saıysqa qatysýshylar Londonǵa jetedi. Ary qaraı Frantsııaǵa bet alǵan qatysýshylardyń ozyp shyqqan aldyńǵy toby 9 shilde kúni Belgııanyń Ipr qalasynda jarystyń 5-shi satysyn bastaıdy.