Brıtanııada koronavırýs juqtyrǵandar sany tómendeýde

LONDON. QazAqparat – Brıtanııada koronavırýs juqtyrý koeffıtsenti tómendep jatyr. 7 mıllıonǵa jýyq adam ekpe alǵannan keıin Pfizer/BioNTech vaktsınasy qaýipsiz dep tanyldy. Bul týraly QazAqparat VVS silteme jasap habarlaıdy.

Keıingi aptada Birikken Koroldyqtaǵy Covid-19 juqtyrý oqıǵalary kúnine 2-5 paıyzǵa azaıyp jatyr.

Juma kúni densaýlyq saqtaý mınıstrligi R koeffıtsıenti degen atpen tanylǵan aýrýdyń óndiris koffıtsıenti ár óńirde 0,7-den 1-ge deıingi aralyqta ekenin aıtty.

Bir apta buryn bul koffıtsıent 0,7-1,1 aralyǵynda bolǵan.

Ol ár jańa naýqas emdelýdi bastaǵanǵa deıin qansha adamǵa indet juqtyratynyn kórsetedi. Eger R koeffıtsıenti birden tómendese epıdemııa azaıyp kele jatqanyn kórsetedi.

Anglııada qazirgi ýaqytta R koeffıtsıenti 0,7-0,9 aralyǵynda, al Londonda bul kórsetkish – 0,6-09.

«Endi Anglııada epıdemııa qysqaryp jatyr dep senimmen aıtýǵa bolady, biraq múmkindiginshe, burynǵydaı úıde otyrǵan durys», - delingen densaýlyq saqtaý mınıstrliginiń málimdemesinde.

Mamyrdyń basynda 50 jastan asqan brıtandyqtardyń bárine Covid-19-ǵa qarsy ekpe salý josparlanyp otyr. Premer-Mınıstr Borıs Djonson jaǵdaı Pashaǵa qaraı jaqsarady jáne bıyl adamdar jazǵy demalystaryn durys ótkize alady dep úmittenedi.

Úkimettiń tótenshe jaǵdaılar boıynsha ǵylymı keńesshileri tobynyń (SAGE) múshesi professor Grem Medlı jalpy jaǵdaıdyń jaqsaryp kele jatqanyn rastap, biraq úkimetti karantın erejelerin jeńildetýdiń naqty bir kúnine nazar aýdarmaı, «kúntizbe boıynsha emes, jaǵdaıǵa qaraı» áreket etýge shaqyrdy.

Eske salsaq, Brıtanııa koronavırýstan eń kóp zardap shekken Eýropadaǵy elderdiń biri. Djons Hopkıns ýnıversıtetiniń sońǵy málimetine sáıkes, álemdegi koronavırýs juqtyrǵan adamdar sany boıynsha Ulybrıtanııa AQSh, Úndistan, Brazılııa keıin tórtinshi oryndy túıindep tur.