Brıtanııada qazaq qyzy iri meıramhanalardyń tapsyrysymen nan pisiredi

ASTANA. QazAqparat - Shynar Baqysheva - Ulybrıtanııanyń soltústik-shyǵys jaǵalaýynda ornalasqan Nıýkasl qalasyndaǵy Fresh Artisan Bread Company naýbaıhanasynyń ıegeri.

Chroniclelive.co.uk sholýshysy Djeın Holl sońǵy 12 aıda Nıýkasldaǵy iri 20 saýda núktesin nanmen qamtamasyz etip kele jatqan Shynardyń jetistigi týraly jazdy.

«Men adamdardyń nanǵa degen mahabbatyn oıatýǵa tyrysyp jatyrmyn», - dedi Shynar.

Qaraǵandyda týyp-ósken Shynar kezinde  Chevron korporatsııasynda aýdarmashy bolyp jumys istegen. Sol kezde ol bolashaq kúıeýi brıtandyq Rasany kezdestirgen. Onyń óz mamandyǵy - sáýletshi. Qazir olar Alıka jáne Lýka atty eki balasymen Nıýkaslda turyp jatyr.

Ol balalarynyń arqasynda óz naýbaıhanasyn ashý týraly oıdy júzege asyrǵan. Ol barlyq klıentterin nanmen qamtamasyz etý úshin túngi ekide oıanyp, jumys isteıdi.

Ol óziniń súıikti isimen aınalysý úshin keńsedegi jumysynan qol úzgen. «Iá, qazir men únemi un men qamyrdyń ortasyndamyn! Maǵan basqa eshteńe kerek emes», - deıdi ol.

Ulybrıtanııaǵa alǵash ret 2005 jyly kelgen Shynar eldegi nannyń sapasyna tańǵalǵan. Onyń aıtýynsha, munda nandar ónerkásiptik aýqymda jasalǵan jáne túrli qospalardan quralǵan. Qazaqstanda bári basqasha.

«Ulybrıtanııada adamdardyń bizdiń eldegideı daıyndamaıtyndaryn túsinbeıtinmin. Jartylaı daıyn ónimdi qysqa tolqyndy peshke salyp, jylytyp, sodan tamaq jasaıtyndaryn túsine almaımyn. Qazirge deıin túsinbeımin», - dep bólisti Shynar.

«Qazaqstanda nan - óte mańyzdy. Ol qonaqjaılylyqtyń belgisi», - dep atap ótti ol.

Shynar óz isin birden ashpaǵan. Alǵashqyda ol Shotlandııa men Ulybrıtanııada nan pisirý isi kýrsyn támamdaǵan. Keıin osy saladaǵy birneshe kompanııada jumys istegen.

«Men ár tutynýshyǵa kóńil bólemin. Klıenttermen ústel basyna otyryp, barlyǵyn kúle otyryp talqylaǵannyń ózin unatamyn», - dedi ol.