Brıtanııada alǵash ret jatyr aýystyrý operatsııasy sátti jasaldy

ASTANA. QazAqparat – Brıtanııada alǵashqy jatyr transplantatsııasy sátti ótti. Naýqastyń ápkesi donor boldy. Eki áıeldiń de jaǵdaıy jaqsy, dep habarlaıdy QazAqparat VVS-ge silteme jasap.

Ota bir apta buryn jasaldy, biraq ol týraly apaly-sińliniń jaǵdaıy birshama jaqsarǵan soń endi habarlandy.

Hırýrgtardyń aıtýynsha, eki ret júrgizilgen sátti otadan keıin ekeýiniń de «baqyttan basy aınaldy».

Ota Oksfordtaǵy aýrýhanada toǵyz saǵattan astam ýaqytqa sozyldy.

Eki áıel de esimin jarııalamaýdy suraǵan. Úlkeni 40 jasta, onyń eki balasy bar, ol endi balaly bolmaý jóninde sheshim qabyldaǵan.

Sińlisi Maıer-Rokıtanskıı-Kaster-Haýzer (MRKH) sındromymen týǵan. Oǵan shaldyqqandardyń jatyry damymaıdy nemese múldem bolmaıdy. Onyń basty belgisi – jasóspirim qyzdarda etekkirdiń bolmaýy. Oǵan álemde 5 myń áıeldiń biri shaldyǵady.

Biraq, aýyratyn áıelderdiń anabezi zaqymdalmaıdy, qalypty jumys istep turady.

Buǵan deıin mundaı naýqastar sýrrogat analardyń kómegimen ǵana balaly bolǵan. Transplantatsııanyń kómegimen endi olar júkti bola alady, biraq tabıǵı jolmen emes, tek kesar tiligimen bosanady.

Jatyr transplantatsııasynyń basqa organdardan aıyrmashylyǵy – ol ómir boıyna emes, áıel bala kóterý úshin tek birneshe jylǵa jasalady. Keıin organdy alyp tastaıdy, áıel qalypty ómir súredi jáne ımmýndyq júıeni tómendetetin dáriler qabyldamaýǵa bolady.

Operatsııaǵa deıin sińlisi embrıondar jasaý úshin kúıeýiniń spermatozoıdtarymen uryqtandyrylǵan jumyrtqalardy alý úshin ovýlıatsııany yntalandyrýdyń eki tsıklynan ótken.

Transplantatsııa sátti bolǵan jaǵdaıda olardy donorlyq jatyrǵa transplantatsııalaý úshin eń ómirsheń bes embrıon qatyryldy. Jetekshi hırýrg professor Smıttiń aıtýynsha, qazirgi ýaqytta transplantatsııalanǵan jatyr «óte jaqsy jumys istep jatyr».

Osy jyldyń kúzinde Ulybrıtanııadaǵy taǵy bir áıelge basqa áıeldiń jatyryn salý josparlanyp otyr.

Taǵy birneshe naýqas óz kezegin kútip júr.