Brıtanııa sarapshysy: Qazaqstanda saılaý júıesiniń damýyndaǵy jańa kezeń ótýde

LONDON. QazAqparat – Táýelsiz brıtanııalyq sarapshy Qazaqstanda ótetin aldaǵy saıası dodany saılaý júıesiniń damýyndaǵy taǵy bir jańa kezeń dep baǵalady. Shtattan tys redaktor jáne jýrnalıst, postkeńestik qaqtyǵystar men saıasat jónindegi sarapshy Nıl Vatson Qazaqstan Respýblıkasynyń Parlamenti Májilisine depýtattar batystyq demokratııa úlgisinde tańdalatyndyǵyna senimdi, dep habarlaıdy QazAqparat tilshisi.

Brıtanııalyq jýrnalısttiń aıtýynsha, Qazaqstanda saıası partııalardy qurý úshin múshe sanyn 40 myńnan 20 myńǵa deıin eki ese azaıtý - pikir alýandyǵyn qamtamasyz etedi. Al partııalyq saılaý tizimderinde áıelder men jastar úshin keminde 30% mólsherindegi kvotany engizý názik jandylar men jas býyn ókilderin belsendi bolýǵa jáne saıası protsesterge qatysýǵa yntalandyrmaq. Nıl Vatsonnyń paıymdaýynsha, aldaǵy saılaý Memleket basshysy Qasym-Jomart Toqaev uıytqy bolǵan «Halyq únine qulaq asatyn memleket» tujyrymdamasynyń ári qaraı damýyna sebepshi bolady.

«Meniń kóńilimnen shyqqany, birqatar konstıtýtsııalyq zańdarǵa túzetýler engizý arqyly parlamenttik oppozıtsııa ınstıtýtyn qurý máselesi qolǵa alynyp otyr. Parlamenttik oppozıtsııa quqyqtarynyń aýqymy meılinshe keńeıedi – olar jańarǵan parlamentte parlamenttik tyńdaý ótkizý jóninde bastama kóterý quqyǵyna ıe bolady. Bul táýelsiz Qazaqstan batystyq úlgidegi demokratııaǵa baǵyt alǵandyǵynyń belgisi», - dedi sarapshy.

Aıta ketý kerek, Anglııada qazir – úshinshi jalpyulttyq lokdaýn. Londonda jáne Birikken Koroldiktiń kóptegen aımaqtarynda karantındik shekteýlerdiń eń joǵarǵy deńgeıi jarııalanǵan. Biraq Qazaqstannyń Ulybrıtanııadaǵy Elshiligi jergilikti bılikten saılaý ótkizýge ruqsat alyp otyr. Sondyqtan Tumandy Albıonda ýaqytsha turyp jatqan qazaqstandyqtar búgin, 10 qańtar kúni esh kedergisiz óz tańdaýyn jasaı alady. Saılaý kezinde qatań sanıtarlyq qaýipsizdik sharalary qolǵa alynyp, áleýmettik ara qashyqtyq meılinshe saqtalatyn bolady.