Brıtanııa mamandary qazaq poezııasyn aǵylshyn tiline aýdarýdy úırenedi
Aǵylshyn tildi aýdıtorııany qazaq poezııasymen jáne mádenıetimen tanystyrýǵa baǵyttalǵan biregeı jobany uıymdastyrýǵa Qazaqstannyń Ulybrıtanııadaǵy Elshiligi jáne Qazaqstannyń Ulttyq aýdarma bıýrosy atsalysqan.
Bir aı boıy ótetin alty semınar aıasynda brıtanııalyq aqyndar, aýdarmashylar men poezııa súıer qaýym Oljas Súleımenov, Gúlnar Salyqbaı, Temirhan Medetbek, Aqberen Elgezek, Tanakóz Tolqynqyzy jáne Erlan Júnis sııaqty tanymal qazaqstandyq aqyndardyń óleńderiniń aǵylshyn tilindegi jetildirilgen nusqalaryn jasaý boıynsha jumys jasamaq. Qazaqstandyq aýdarmashy Ásııa Isemberdıeva brıtanııalyq mamandarǵa óleńderdiń qazaq tilinen aǵylshyn tiline sózbe-sóz aýdarmalaryn usynýda. Sharaǵa ataqty brıtanııalyq aqyndar Djon Stoýn men Lız Berrı moderator retinde qatysyp jatyr.
Poezııa aýdarma ortalyǵynyń semınarlarynda qazaqstandyq avtorlardyń ómirbaıandaryna, elimizdiń mentalıteti men mádenı erekshelikterine, ádebı dástúrlerimizge úlken mán beriledi. Munyń bári aýdarmalardy meılinshe túpnusqaǵa jaqyn etip tárjimalaýǵa jáne aǵylshyn tilinde áýezdi estilýine yqpal etpek.
Birinshi semınar qazaqtyń kórnekti aqyny, ádebıettanýshy, saıasatker jáne antııadrolyq qozǵalystyń belsendisi Oljas Súleımenovtiń shyǵarmashylyǵyna arnaldy. Onyń «Qumyraǵa quıylǵan kez-kelgen ylǵal» óleńi máni men maǵynasy, sondaı-aq týyndy dúnıege kelgen jaǵdaılarǵa qaraı taldaýdan ótti.
Semınardyń qorytyndy ónimi Oljas Súleımenovtyń aýdarylǵan óleńi túrinde Poezııa aýdarma ortalyǵynyń saıtynan tabýǵa bolady. Oǵan qosa saıt qoldanýshylary aldaǵy semınarlarǵa onlaın qatysý úshin tirkele alady.
Poezııa aýdarma ortalyǵyn 2004 jyly brıtanııalyq aqyn jáne aýdarmashy Sara Magýaır qurǵan. Uıymnyń maqsaty aǵylshyntildi aýdıtorııany álemniń jetekshi aqyndarymen tanystyrý, sondaı-aq Ulybrıtanııadaǵy mádenı áralýandylyqty damytý.
Aıta ketý kerek sharaǵa moderatorlyq etýshiler álemge aty shyqqan shyǵarmashylyq ókilderi. Máselen, Djon Stoýn óziniń «Qoldan jasalǵan dúnıeler mektebi» (School of Forgery) atty debıýttik óleńder jınaǵymen belgili. Ol sondaı-aq «Jaman jigit Katýll» - ejelgi Rım aqyny Gaı Valerıı Katýlldyń eńbekterin jańasha aýdarǵan zamanaýı avtor retinde tanymal. Bul týyndy «The Guardian» basylymynyń nusqasy boıynsha 2018 jyldyń eń úzdik 10 poetıkalyq antologııasynyń tizimine engen.
Lız Berrı bolsa, eń úzdik óleńi úshin 2018 jylǵy «Forward Prize for Poetry» syılyǵynyń ıegeri atanǵan. Onyń alǵashqy «Qara el» (Black Country) jyr jınaǵyn Poezııa qoǵamy joǵary baǵalaǵan. Berrı Somerset Moem syılyǵyn, Djeffrı Faber memorıaldy syılyǵyn jáne 2014 jyly eń jaqsy debıýttik óleńder jınaǵy úshin «Forward Prize for Poetry» syılyǵyn ıemdengen.