Brıtanııa densaýlyq saqtaý mınıstri indet juqtyrdy, Ispanııa túnde dalaǵa shyǵýǵa tyıym saldy

NUR-SULTAN. QazAqparat - Koronavırýstyń taralýyna jol bermeý jónindegi vedomstvoaralyq komıssııa álemdegi epıdemıologııalyq ahýalǵa sholý jasady, dep habarlaıdy QazAqparat.

SARS-CoV-2 eshkimdi aıamaıdy. Ulybrıtanııanyń densaýlyq saqtaý mınıstri COVID-19-ben syrqattanyp qaldy.

Sadjıd Djavıd Twitter paraqshasynda eki doza vaktsına qabyldaǵanyn jáne óz aǵzasynda aýrýdyń «jeńil» belgileri kórinis berip jatqanyn jazdy.

Qazirgi ýaqytta mınıstr otbasymen birge óz úıinde oqshaýlanǵan. S. Djavıd aýrýdyń aýyr zardaptaryn boldyrmas úshin brıtandyqtardy vaktsınatsııaǵa shaqyrdy.

Resmı málimetterge sáıkes, Ulybrıtanııada sońǵy táýlikte 51 870 jańa indet juqtyrý deregi anyqtaldy.

KVI faktileriniń jalpy sany 5 332 371-ge deıin artyp, Ulybrıtanııada koronavırýstyń saldarynan qaıtys bolǵandar sany 128 642 adamǵa jetti.

Bul elde eresekterdiń 87%-dan astamy vaktsınanyń alǵashqy dozasyn qabyldady, ekeýin de saldyrǵandardyń úlesi - 67%.

Iranda COVID-19 vırýsyn juqtyrǵan azamattardyń sany ósip otyr. Ótken táýlikte 15 139 jańa jaǵdaı anyqtaldy. Vırýsty juqtyrǵandardyń jalpy sany 3 501 079-ǵa jetti.

Eldiń densaýlyq saqtaý mınıstrligi koronavırýs qurbandarynyń sany 86 966 adamdy quraǵanyn rastap, sońǵy 24 saǵat ishinde 175 adam qaıtys bolǵanyn jarııalady.

Irannyń COVID-19-ben kúres boıynsha ulttyq shtabynyń resmı ókili Alıreza Raısı bul elde delta shtamy tez tarap jatqanyn málimdedi.

Búginge deıin Iranda koronavırýsqa qarsy 5 891 385 adamǵa vaktsına egilgen, onyń 2 252 021-i eki dozany da alǵan.

Qalypty týrıstik maýsymǵa taǵy qaýip tónip tur. Eýropa shekteýlerdi qaıta kúsheıte bastady.

Ispanııada túngi jaǵajaı keshterine tyıym salynady, elde komendanttyq saǵat engizilgen.

Túngi saǵat 1-den tańǵy 6-ǵa deıin koronavırýs juqtyrý qaýpi joǵary aýmaqtarda dalaǵa shyǵýǵa tyıym salynǵan.

Karantın shekteýleri Barselonada jáne áıgili Sıtjes, Saloý jáne Loret-de-Mar kýrorttarynda engizilgen.

Shekteýler eldegi delta shtamyn juqtyrǵandar sanynyń kóbeıgenine baılanysty engizilip otyr, ásirese, vaktsınatsııadan bas tartqan jastar arasynda aýrý tez taraǵan.

Grekııa da karantın talabyn kúsheıtti. Tamyzdyń sońyna deıin tek vaktsınatsııalanǵan adamdar meıramhana, bar, teatrlar men kınoteatrlarǵa bara alady.

Eldegi ınfektsııa juqtyrǵandardyń kópshiligi deltamen syrqattanǵan. Bılik vırýstyń taralýyna barlar men meıramhanalardy kinálaıdy.