Brıtandyqtar Qazaqstan halqyna merekelik quttyqtaýlaryn joldady
Qazaqstannyń Londondaǵy elshiligi áleýmettik jelide tumandy Albıon turǵyndary Naýryzǵa oraı qazaqstandyqtardy quttyqtaǵan vıdeorolık jarııalady.
Naýryz - kóktem meıramy jáne Ortalyq Azııa halyqtarynyń Jańa jyly. Ókinishke qaraı, ǵasyrlar boıy jalǵasyp kele jatqan qasıetti merekeni toılaý keńes zamany kezinde úzildi. Qazaqstanda da talaı jyldar boıy bul dinı mereke dep sanalyp, tyıym salyndy. Sońǵy ret 1926 jyly toılanǵan Naýryz meıramy elimizde 1988 jyldan bastap qaıtadan atala bastady. 2001 jyly Naýryz meıramy memlekettik mereke retinde jarııalandy.
Eske salaıyq, keshe QR Prezıdenti Nursultan Nazarbaev barsha qazaqstandyqtardy Naýryz meıramymen quttyqtap, «Baǵzy zamannan kele jatqan mereke Táýelsizdikpen birge qaıta oraldy. Minekı, Táýelsizdikti alǵaly beri osy Naýryzdy atap kele jatyrmyz. Túbinde bul bizdiń negizgi jańajyldyq merekemiz bolady», - degen edi.
Aıta keteıik, Amerıkanyń «Humming House» folk-toby da erekshe quttyqtaý arnap, «Úrker» tobynyń ánshisi Aıdos Saǵatovpen birge áıgili «Naýryz» ánin oryndaǵan bolatyn.
Budan bólek, qazaqstandyqtardy Naýryzben Latvııa men Grýzııa turǵyndary quttyqtady. Quttyqtaý-beınejazbasyn QR Syrtqy ister mınıstrligi baspasóz qyzmetiniń jetekshisi Ánýar Jaınaqov Feısbýktegi óz paraqshasynda jarııalady.