Brıtandyq Sonders rıngte Golovkınnen qashýmen bolady - Baqtııar Artaev
«Osyndaı sportqa kelgen adamdar, kóbinese qarapaıym otbasynyń balalary. Áleýmettik jaǵdaıy joǵary otbasynyń balalary sportqa barmaıdy. Qazirgi kezde sporttyń arqasynda úlken jetistikke jetip, ata-anasyna úı alyp berip, óziniń jaǵdaıyn jasaýǵa tyrysatyn qarapaıym otbasylardan shyqqan balalar kóp. Al endi brıtandyq boksshy Bıllı Djo Sonders te qarapaıym otbasydan shyqqan jigit. Sonders qarsylas retinde Golovkındi kórgisi keledi, ıaǵnı ol birinshi kezekte aqsha tapqysy keledi. Bul jerde qarajat máselesinde kelispeýshilik bolýy múmkin. Sportta júrgennen keıin, er azamat bolǵan soń, olardyń barlyǵy jekpe-jekke daıyn, alaıda bıznes jaǵynan kelise almaıtyn jaǵdaılar týyndaıdy», - dep toqtaldy Olımpıada chempıony «Qazsport» telearnasynda aıtqan pikirinde.
Onyń paıymynsha, Bıllı Djo Sonders Gennadıı Golovkınmen kezdesken jaǵdaıda, brıtandyq boksshy qazaqstandyq bylǵary qolǵap sheberine asa aýyr qarsylas bolmaıdy.
«Óıkeni Sonderstiń aıtarlyqtaı joıqyn soqqysy joq. Sondyqtan ol rıngtiń «besinshi buryshyn» izdep, qashýmen bolady. Onyń jeńiske jetýge múmkindigi bola qoımas. Jekpe-jek uzaqqa sozylýy yqtımal, ıaǵnı ol óziniń shıraqtyǵy arqasynda kóp soqqyny darytpaýy múmkin. Bul jekpe-jek tek osynysymen ǵana qyzyq bolady degen oıdamyn», - dedi B. Artaev.
Onyń sózine qaraǵanda, eger Gennadıı Golovkın ýkraınalyq Sergeı Derevıanchenkomen nemese Saýl «Kanelo» Alvarespen kezdesse, bul jekpe-jekter óte tartysty óter edi.
«Al eger Sonderspen bolatyn jekpe-jek eldiń kóńilinen shyqpaýy yqtımal. Sebebi biz barlyǵymyz tartysty kezdesýdi kútip otyrmyz», - dep túıdi Baqtııar Artaev.
Aıta keteıik, qazaqstandyq kásipqoı boksshy Gennadıı Golovkın Karsondaǵy (AQSh, Kalıfornııa shtaty) StubHub Center arenasynda qarsylasy Vanes Martırosıandy jeńip, óz tıtýldaryn qorǵady.
Foto: kfb.kz