Brıtandyq koronavırýs shtamynyń Qazaqstanda taralý qaýpi bar ma

NUR-SULTAN. QazAqparat – Búgingi tańda Ulybrıtanııada anyqtalǵan koronavırýstyń jańa túri álemniń birneshe elderinde – Qytaıda, AQSh-ta jáne Eýropa aımaqtarynda taralýda. Onyń Qazaqstanda taralý qaýpi qanshalyqty joǵary? Bul týraly Ortalyq kommýnıkatsııalar qyzmetinde ótken brıfıngide aıtyldy, dep habarlaıdy QazAqparat tilshisi.

«Mamyr aıy men qyrkúıek aıy aralyǵynda tabylǵan 130 synamaǵa genetıkalyq zertteý júrgizdik. Vırýstar arasynan brıtandyq mýtatsııa tabylǵan joq. Bul vırýstar Germanııa, Ispanııa, Ýkraına, Reseı, AQSh jáne Qytaıda tabylǵan vırýstarǵa uqsas. Búgingi kúni biz kelesi genetıkalyq testileý júrgizý úshin qazan men jeltoqsan aralyǵynda aımaqtardan tabylǵan synamalardy jınap jatyrmyz», - deıdi QR DSM sanıtarlyq-epıdemıologııalyq baqylaý komıtetiniń tóraıymy Aıjan Esmaǵambetova.

Sondaı-aq, ol Brıtanııa men Qazaqstan arasynda tikeleı baılanys joq ekenin jetkizdi.

«Esterińizde bolsa, 6 qazannan bastap shetelden keletinderge PTR testten ótý týraly talap qoıylǵan. PTR testten ótpegender mindetti túrde karantındik statsıonarǵa ornalasyp, PTR test tapsyryp, nátıjesin sol jerde kútedi. Negizi vırýstardyń mýtatsııalanýy – qalypty jaǵdaı. Koronavırýs genetıkalyq turǵydan adamǵa qatysy joq, jarqanattarǵa qatysy bar vırýs. Ol bir jyl boıy ózgeriske ushyrap, beıimdelip keledi. Ol mýtatsııalanǵan vırýs jáne mýtatsııalana beredi», - deıdi Aıjan Esmaǵambetova.