Brıtan jankúıerleri Dımashty mereıtoıymen quttyqtady
Olar arnaıy beınebaıan túsirip, áleýmettik jelilerge jarııalady, dep habarlaıdy Kazinform-nyń osy eldegi menshikti tilshisi Ǵalymjan Qaramanuly.
Ulybrıtanııada Dımashtyń eki fan-klýby bar. Onyń músheleri dúnıeni dala daýsymen dúr silkindirgen qazaq balasynyń ónerine ǵashyq. Ánderin túsiný úshin uly Abaı tilin úırenip, Qazaqstanǵa saıahattap ta júr. 30-dan astam adam Londonnyń kórnekti oryndarynda jınalyp, ánshige júrekjardy lebizderin jetkizdi. Ulybrıtanııanyń ǵana emes, Reseı, Brazılııa, Rýmynııa jáne basqa da memleketterdiń azamattary qoldaryna Qazaqstannyń jáne Ulybrıtanııanyń týlaryn ustap, jurtshylyqtyń nazaryn ózderine aýdardy. Qamajaı bıin bılep, qazaq tilinde án aıtty.
«Biz Ulybrıtanııadaǵy dıerstar qaýymy Dımashqa quttyqtaýymyzdy joldaımyz. Onyń adam nanǵysyz ǵajap daýysy bizdiń júregimizdi jaýlap aldy. Al mýzykasy álemniń túkpir-túkpirindegi halyqty biriktirdi. Dımash, seniń ónerdegi qanatyń talmasyn. Ánderiń bizdi shabyttandyra bersin. Kezekti kontsertińdi asyǵa kútemiz. Ulybrıtanııadaǵy jankúıerleriń seni jaqsy kóredi», - dedi fan klýbtyń negizin qalaýshy Anka Tımofte.