Brıtan halqyn kedeıshilik qamyty qysty

<p>LONDON. KAZINFORM — Ulybrıtanııa halqy birneshe kúnnen keıin bılik partııasyn tańdap, daýys beredi. Saılaýaldy naýqan bastalǵaly premer-mınıstr Rıshı Sýnak ınflıatsııa deńgeıi tómendep, jaǵdaı jaqsardy deýden jalyqpaı keledi. Biraq eldegi mıllıondaǵan saılaýshynyń turmys deńgeıi áli de tómen. Azyq-túlik jáne jaryq pen gazdyń baǵasy aldyńǵy jyldarmen salystyrǵanda aspandap tur. Ipotekalyq nesıe paıyzy eselenip, páter jaldaý aqysy da qymbattap ketken, dep habarlaıdy <a href="https://kaz.inform.kz/" target="_blank" rel="noopener">Kazinform</a> agenttiginiń Londondaǵy tilshisi Ǵalymjan Qaramanuly.  </p>

Domınık Ýotters jasóspirim qyzyn jalǵyz ózi tárbıelep keledi. Memleketten alǵan járdemaqysy iship-jemine áreń jetedi.

Tolyqqandy as daıyndaıyn dese gaz ben elektr energııasynyń aqysy qalta kótermeıdi.

Sondyqtan jalǵyzbasty áke qaıyrymdylyq uıymy bergen tamaqty qysqa tolqyndy peshke ysytyp, talǵajaý etip júr.

«Balaǵa járdemaqy alyp, kún kóretinim janymdy jegideı jeıdi. Ómirdiń qataldyǵynan sharshadym. Biz sııaqty otbasy óte kóp. Olar ári qaraı qalaı áreket etý kerektigin bilmeıdi. Biz, tipti, birinshi qajettiliktegi zattardy da ala almaımyz», — deıdi jalǵyzbasty áke Domınık Ýotters.

Sheneýnikter bolsa, qurǵaq sandar statıstıkasyn keltirgennen ári asa almaı otyr. Olar mamyr aıynda ınflıatsııa deńgeıiniń maqsatty eki paıyzǵa qaıta oralǵanyn alǵa tartady.

Foto: Ǵalymjan Qaramanuly/Kazinform

Bılikke Leıborıster partııasy kelse, jaǵdaı basqasha bolar edi deıdi qarjy mınıstri.

Memlekettik sektorda jumys isteıtinderdiń narazylyqqa shyqqanyn aıyptap, basqa da batyl sheshimder qabyldamaǵanda jaǵdaı qıyn bolar edi deıdi ol.

«Bir jarym jyl buryn bizdegi ınflıatsııa deńgeıi basqa iri ekonomıkalarǵa qaraǵanda joǵary boldy. Búgin ol tómendedi. Bul bizdiń bilek sybana áreket etýimizdiń arqasynda júzege asty. Salyqtar tómendep jatyr jáne ıpoteka arzandaıdy dep úmittenemin», — dedi Ulybrıtanııa Qarjy mınıstri Djeremı Hant.

Kóleńkeli úkimettiń qarjy mınıstri jáne Leıborıster partııasynyń ókili Reıchel Rıvz ınflıatsııa deńgeıiniń maqsatty kórsetkishke oralǵanyn quptaıdy.

Biraq qarapaıym halyq qymbatshylyq qyspaǵynan qutyla almaı otyr jáne ómir súrý qunynyń daǵdarysy alqymnan aldy deıdi ol.

«Kóptegen otbasy jáne zeınetker úshin ómir súrý qunynyń daǵdarysy áli de ótkir tur. Óıtkeni buǵaýsyz ketken baǵalarǵa toqtam joq. Páter jaldaý quny, ıpoteka, azyq-túlik aqysy nemese elektr energııasy úshin tólemder kedeıshiliktiń qamytyn kıgenderdi qyspaqqa aldy», — dedi Ulybrıtanııa kóleńkeli úkimetiniń Qarjy mınıstri, Leıborıster partııasynyń múshesi Reıchel Rıvz.

Anglııa banki bolsa, ınflıatsııany tejeý úshin paıyzdyq mólsherlemeni jetinshi ret ózgerissiz qaldyrdy.

Bul — sońǵy 16 jylda bolmaǵan eń joǵary kórsetkish. Sarapshylar qýanýǵa áli erte dep esepteıdi.

«Inflıatsııa osy jyldyń sońynda azdap kóterilýi múmkin. Tek kelesi jyly ol eki paıyzǵa qaıta oralady. Bul energııa kózderiniń qymbattaýymen baılanysty qubylys, ” dedi KPMG halyqaralyq aýdıt-konsaltıngtıktik uıymnyń bas ekonomısi ıAel Selfın.

Inflıatsııany maqsatty deńgeıge jetkizgen bılik partııasyna degen saılaýshylardyń súıispenshiligi arta ma? Saýalnamalarǵa sensek baǵany turaqtandyra almaǵan konservatorlarǵa halyq ashýly. Aılyǵy azdar baılyǵy kóp Rıshı Sýnakqa ókpeli.

«Rıshı Sýnak, siz basynyp bara jatqan baǵany retke keltirmeseńiz bolmaıdy! Bul máselege jaýapty adam qymbatshylyqty aýyzdyqtasyn. Bizdiń azyq-túlik satyp alýǵa shamamyz joq. Biz mıllıoner emespiz, qarapaıym adambyz. Jalaqymyz burynǵy deńgeıde qaldy!» dedi bloger Fara Shams.

Pandemııadan soń 2021 jyldyń ekinshi jartysynda ınflıatsııa batys ekonomıkalarynyń kópshiliginde qarqyn aldy. Ý

kraınadaǵy jaǵdaıdan keıin jaǵdaı tipti qıyndap, tabıǵı gaz baǵasy kúrt ósti. Sońǵy 3 jylda Ulybrıtanııada azyq-túlik baǵasy shamamen 20 paıyzǵa qymbattady.

Bul óz kezeginde ómir súrý deńgeıiniń tómendeýine ákelip, saılaýshylardyń konservatorlarǵa degen senimi joǵaldy.

Biraq bılikke qaı partııa kelse de ekonomıkany qaıta qalpyna keltirý úshin biraz eńbek jáne sáttilik qajet deıdi sarapshylar.