Brıtan halqy bılikke senýden qaldy

<p>LONDON. KAZINFORM&nbsp;&mdash; Brıtanııalyqtardyń saıasatkerlerge degen senimi buryn-sońdy bolmaǵan rekordtyq tómen deńgeıge túsip ketti. Saraptamaǵa sáıkes, bul eń aldymen Breksıtpen baılanysty. Buǵan saıası janjaldar men ómir súrý qunynyń daǵdarysyn qosyńyz. Konservatorlar bılikte qalý úshin saılaýaldy ýádelerin úıip-tógip berýde. Biraq 14 jyl el&nbsp;basqarǵan torılerden elektorat taǵy bir múmkindik bere me?</p>

Ulttyq áleýmettik zertteýler ortalyǵynyń saýalnama nátıjelerine sáıkessaılaýshylardyń basym kópshiligi basqarý júıesinen jáne bıliktegilerden kóńili qalǵanyn aıtady. Bári Breksıtten bastalǵan. Eýro Odaqtan qutyldyq dep bórikterin aspanǵa atqandardyń qýanyshtary ýaqyt óte kele ókinishpen almasypty.

Brıtanııalyqtar, ásirese, qarjylyq jaǵdaıynyń nasharlaǵanyna qynjylady. Dúkende azyq-túlik qymbat, jylý men jaryqtyń aqysy aspandap tur. Ulttyq densaýlyq saqtaý qyzmetiniń de jaǵdaıy máz emes. Uzyn-sonar kezek, dárigerlerdiń jetispeýshiligi qarasha halyqtyń janyna qatty batqan. 

«Sózderi men isteri esh úılespeıdi. Ant-sý iship, ýádeni úıip-tógip beredi, biraq bılikke kelgennen keıin eshteńe istemeıdi. Jáne osy áreketteri qaıtalana beredi», — deıdi London turǵyndarynyń biri. 

Saılaýshylardyń keıbiri, tipti, daýys berýge barmaıtyndaryn aıtady. Óıtkeni esegi sýdan ótkennen keıin partııalar is bitti, qý kettige salady degen oıda.

«Ókinishke qaraı, Ulttyq densaýlyq saqtaý qyzmetiniń jaǵdaıy múshkil, polıtsııa qyzmetkerleriniń sany azaıyp jatyr. Merııalar qaryzǵa belshesinen batty. Bir búıirden qymbatshylyq qysty. Máseleni sheship jatqan eshkim joq», — deıdi dep nalıdy taǵy bir kóshe júrginshisi. 

Degenmen de, konservatorlardyń qarqyny qatty. Partııa kóshbasshysy suhbattarynyń birinde bala kezinde kóp nárseden qalys qalǵanyn aıtyp, aǵynan aqtaryldy — Rıshı Sýnak aqyly kabeldik telearna kórmeı ósken eken. Onyń bul esteligi kedeıshiliktiń qamytyn kıgen brıtanııalyqtardyń ashý-yzasyn týǵyzdy. ІІІ-shi Charlz Patshadan da aýqatty, Ulybrıtanııa tarıhyndaǵy eń baı premer-mınıstr qarasha halyqtyń muń-muqtajynan habardarsyz ba degen oı keldi.

«Bala kúnimizde kóp nárseden qalys qaldyq. Óıtkeni meniń ata-analarym aqshany bilimimizge quıdy. Máselen, bizdiń úıimizde Sky TV bolmady», — dedi Ulybrıtanııanyń premer-mınıstri Rıshı Sýnak.

Ómir súrý quny qymbattaǵandyqtan aılyǵyn shaılyǵyna jetkize almaı júrgender kóp. Biraq oǵan konservatorlar ózderin kináli sanamaıdy. Premerdiń pikirinshe, bılikte otyrǵan sońǵy 14 jyldyń ishinde partııa biraz belesterdi baǵyndyrǵan. Biraq saılaýshylar Sýnaktyń sózine senýden qaldy. Sońǵy júrgizilgen saýalnamaǵa sáıkes olar reformatorlardy qoldaıtyndyqtaryn aıtqan. Naıdjel Faradj basqaratyn partııa Leıborısterden keıin ekinshi orynda keledi.

«Eger siz maǵan parlament múshesi bolý mártebesin berseńiz, men halyq múddesi úshin kúresemin. Men retteýshi organdarǵa qarsy shyǵyp, shaǵyn bızneske jaqtasamyn. Men halyqtyń quqyqtary úshin kúresemin», — dedi Reformalar partııasynyń kóshbasshysy Naıdjel Faradj. 

Kezinde Breksıtti qoldap, eldiń Eýro Odaq quramynan shyǵýyna atsalysqan saıasatkerdi de súıkimsiz sanaıtyndar kóp. Saılaýaldy naýqan kezinde úgit-nasıhatpen aınalysyp júrgen Faradjdyń betine sútten jasalǵan kokteıl de shashyldy, konserv qutysy da laqtyryldy.

«Kovıd kezindegi Daýnıng strıtte oıyn-saýyq qurǵan Borıs Djonson otstavkaǵa ketti. Odan keıin premerlikke Lız Trass kelip, qysqa merzimde eldiń astan-kesteńin shyǵardy. Ony aýystyrǵan Rıshı Sýnaktyń da saıasaty sátti júzege aspady. Konservatorlardyń bılikpen qoshtasatyn ýaqyty kelgen sııaqty. Oǵan saýalnamalardyń nátıjesi dálel», — deıdi saılaý sarapshysy Djon Kertıs.

Konservator, leıborıst jáne reformashylardan bólek lıber-demokrattar da alamanǵa túsip jatyr. Kóp daýys jınaǵan partııa jeńimpaz atanyp, óziniń úkimetin jasaqtaıdy jáne kóshbasshysy premer-mınıstr atanady. 4-shi shilde kúni saılaý nátıjeleri belgili bolmaq.