Brıtan armııasynyń bes jylqysy London kóshelerimen jarysa shapty

<p>ASTANA. KAZINFORM &mdash; Brıtan armııasynyń kavalerııalyq polkiniń bes jylqysy shabandozdaryn laqtyra sap, London kóshelerimen jarysa shapty, dep jazady <a href="https://ru.euronews.com/2024/04/24/uk-rideless-horses" target="_blank" rel="noopener">Euronews.</a></p>

Korol Charlz III-tiń týǵan kúnine arnalǵan paradqa daıyndyq kezinde Brıtan armııasynyń kavalerııalyq polkiniń bes jylqysy belgisiz sebeptermen shabandozdaryn laqtyra sap, London kóshelerimen jarysa shaba jónelgen. Olar birneshe saǵattan keıin ustaldy.

Jylqylardyń biri Býkıngem saraıynyń mańynda turǵan taksıge, ekinshisi turaqta turǵan týrıster avtobýsyna soqtyǵysqan. Jylqymen soqtyǵysyp jáne ustaý kezinde tórt adam zardap shekti. Keıbir janýarlar da jaraqat alyp, olarǵa veterınarlyq kómek kórsetilgen.

Áleýmettik jelide aq jáne qara tústi qos attyń fotosy men vıdeosy keńinen tarap ketti. Bireýiniń aldyńǵy jaǵy qyzyl tústi. Keıin onyń qan ekeni anyqtaldy.

London qalasy polıtsııasynyń habarlaýynsha, eki janýar Londonnyń ortalyǵynan shyǵysqa qaraı 6 km jerde ornalasqan Lımehaýs tusynda quryqtaldy.

Jylqylardyń tura qashýyna ne sebep bolǵany belgisiz. Atty áskerler polki olar qurylys jumystarynyń shýynan shoshyp ketýi múmkin dep boljaıdy.

Janýarlarǵa ıelik etetin Brıtan armııasynyń kavalerııalyq polki saltanatty sharalarǵa, sonyń ishinde brıtandyq monarhtardyń taqqa otyrýyna qatysady.