Biryńǵaı ýaqyt beldeýin engizýden bas tartpaımyz – Arman Shaqqalıev

<p>ASTANA. KAZINFORM &ndash; QR Saýda jáne ıntegratsııa mınıstri Arman Shaqqalıev elimizde ýaqyt beldeýin biryńǵaı júıege aýystyrýǵa qatysty túsinik berdi.</p>

Búgin Parlament Májilisinde tilshiler mınıstrden Shyǵys Qazaqstan oblysy turǵyndarynyń kóbisi ýaqyt beldeýin aýystyrýǵa narazylyq tanytyp otyrǵanyn jáne osy máselege qatysty qandaı sheshim jasalatynyn surady. Óz kezeginde Arman Shaqqalıev elimizde ýaqyt beldeýin biryńǵaı júıege aýystyrýǵa qatysty naqty sheshim jasalǵanyn, sondaı-aq qabyldanǵan sheshim qaıta qaralmaıtynyn aıtty.

«Qaýly qabyldandy jáne birinshi naýryzdan bastap bárimiz bir ýaqyt beldeýinde bolamyz. Shyǵys Qazaqstan oblysyndaǵy azamattarymyzdyń málimdemeleri men ustanymdaryna keler bolsaq, jaqynda barlyq aýdandarda, eldi mekenderde pikirin jarııalaǵan turǵyndarmen kezdestik. Atap aıtqanda, dáleldi bazasy bar ǵalymdar toby naqty derekterge súıenip, biryńǵaı ýaqyt beldeýine kóshý qajet ekenin túsindirdi», - dedi A. Shaqqalıev.

Mınıstr biryńǵaı ýaqyt beldeýine kóshý qosymsha shyǵyndarǵa ákep soqpaıtynyn jetkizdi.

Sonymen qatar ol el halqy paıdalanyp júrgen barlyq gadjetterde ýaqyt beldeýi avtomatty túrde aýysatynyn atap ótti.

Eske sala keteıik, 1 naýryzdan bastap elimizdiń búkil aýmaǵynda biryńǵaı ýaqyt beldeýi ornaıdy. 

Atalǵan ózgeris Úkimet qaýlysymen bekitildi.