Biryńǵaı ýaqyt beldeýi ómirdiń tabıǵı yrǵaǵyna oralýǵa múmkindik berdi — sarapshy

<p>ASTANA. KAZINFORM &mdash; &laquo;Ulttyq qoǵamdyq densaýlyq saqtaý ortalyǵy&raquo; ShJQ RMK basqarma tóraǵasynyń orynbasary Saltanat Nazarova elimizdiń biryńǵaı ýaqyt beldeýine kóshýine qatysty óz pikirimen bólisti. Bul týraly Úkimettiń baspasóz qyzmeti málimdedi.</p>

Ol Qazaqstanda keńestik kezeńde ýaqyt beldeýi komandalyq-josparly ekonomıka múddesi úshin tabıǵı segiz ret ózgergenin atap ótti. Nátıjesinde, adamdar tabıǵı tsıklge sáıkes kelmeıtin ýaqyt beldeýlerinde ómir súrdi.

«Adamnyń ómirlik protsesteri ýaqytqa baılanysty saǵat, kún, apta, aı, maýsym nemese jyldar boıy ózgeredi. Bul ózgerister bıorıtmder dep atalady. Tsırkadııalyq yrǵaqtar — bizdiń densaýlyǵymyz, ónimdiligimiz ben uzaq ómir súrýimizdiń negizi. Kóptegen sheteldik zertteýler bıorıtmder aǵzadaǵy gormondardyń, fermentter men basqa belsendi zattardyń deńgeıin basqarady, sonymen qatar qan quramy men jalpy tepe-teńdikti saqtaıdy dep boljaıdy. Uıqy men sergektik, demalý men belsendilikti, tamaqtaný men zat almasýdy retteıtin bıorıtmderdiń úılesimdi jumysy adam densaýlyǵy úshin mańyzdy ról atqarady. Biryńǵaı ýaqyt beldeýi bıologııalyq saǵatty sınhrondap, resmı ýaqyt pen kún ýaqytyn múmkindiginshe jaqyndata otyryp, ómirdiń tabıǵı arǵaǵyna oralýǵa múmkindik berdi», — dep esepteıdi Saltanat Nazarova.

Eske salsaq, buǵan deıin Úkimet otyrysynda Premer-Mınıstr Oljas Bektenov biryńǵaı ýaqyt beldeýine qatysty ustanymyn aıtqan edi.

Sonymen qatar, Saýda jáne ıntegratsııa mınıstri Arman Shaqqalıev ýaqyt beldeýiniń ózgerýi qazaqstandyqtardyń elektr energııasyna jumsaıtyn shyǵyndaryn kóbeıtpegenin málimdedi.

Budan bólek, Arman Shaqqalıev «Ýaqyt beldeýin aýystyrý — eksperıment emes» ekenin atap ótti.