Brest qamalynyń bir kirpishi astanalyq mýzeıde saqtaýly tur

ASTANA. QazAqparat - 1941 jyly gıtlershilerdiń kútpegen soqqysyna ushyrap, erlikpen qorǵalǵan Brest qamalynyń bir kirpishi Astanadaǵy áskerı-tarıhı mýzeıde saqtaýly tur, dep habarlaıdy QazAqparat tilshisi.

Qundy jádigerdi mýzeıge Keńes Odaǵynyń batyry, general-maıor Ivan Panfılovtyń nemeresi Alýa Baıqadamova tabystaǵan.

«Negizi qamal qyzyl kirpishterden qalanǵan. Nemister otshasharmen (ognemet) shabýyl jasap, kirpishterdiń barlyǵy qap-qara bolyp kúıip ketken. Qamaldyń jertólesinde Keńes jaýyngerleri sońǵy oǵy qalǵansha kúresti. Olardyń eske alýy boıynsha, qamalda temperatýranyń ystyq bolǵany sonshalyq, kirpishter balqyp, joǵarydan tamshylap aǵyp turdy deıdi. Sondyqtan, bul kirpish bolashaq urpaq úshin óte áserli, óte qundy jádiger bolyp qalady», - deıdi Áskerı-tarıhı mýzeıdiń ekskýrsovody, aǵa leıtenant Dáýlet Qadyrov.

Mýzeı qyzmetkeriniń aıtýynsha, qazirgi ýaqytta Brest qamaly qalpyna keltirilgen. Onda qazaqstandyqtardyń erligi qurmetine arnaıy taqta ornatý josparlanyp otyr.

Tarıhı derekterge sáıkes, Brest qamalyn 7 myń sarbaz qorǵaǵan. Sonyń myńǵa jýyǵy - Qazaqstannan barǵan jaýyngerler.