Brent munaıynyń baǵasy naýryzdan beri alǵash ret 125 dollardan asty

NUR-SULTAN. QazAqparat - Londonnyń ICE Futures bırjasynda Brent markaly munaıdyń tamyz aıyndaǵy fıýchersteriniń quny 2,2%-ǵa ósip, barreline 125,02 dollarǵa deıin qymbattady. Osylaısha, Brent munaıy barreliniń baǵasy 9 naýryzdan beri alǵash ret 125 dollardan asty, dep habarlaıdy QazAqparat tilshisi Turan-ǵa silteme jasap.

Osy arada Nıý-Iork taýar bırjasynda shildede jetkiziletin WTI markaly munaı fıýchersteriniń baǵasy barreline 2,1%-ǵa ósip, 123,45 dollardy qurady.

Munaı baǵasy álemdik naryqtaǵy tapshylyq qaýpinen kóterildi. Lıvııada saıası daǵdarys jaǵdaıynda munaı eksportynyń kúrt tómendeýi naryq qatysýshylaryn úreıge túsirdi.

Eldegi tolqýlar saldarynan Lıvııadaǵy munaı óndirisiniń deńgeıi 90% tómendegen. Lıvııanyń táýligine 1,2 mıllıon barrel óndirisinen nebári 0,1 mıllıony ǵana qaldy.

Buǵan deıin mamyrda OPEK elderi munaı óndirýdi táýligine 176 myń barrelge azaıtyp, uıymnyń aı saıynǵy esebine sáıkes 28,5 mıllıon barrelge deıin tómendetkeni habarlanǵan.

Mamyrda munaı óndirýdi shekteý týraly OPEK+ kelisimine qatysýshy OPEK elderi kelisimdi 196%-ǵa oryndady.

Osylaısha, mamyr aıynda táýligine 25,59 mln barrel óndirip, ruqsat etilgen óndirý deńgeıinen 1,05 mln barrelge artta qaldy.