Brent markaly munaıdyń baǵasy barreline 38,96 dollarǵa deıin tómendedi

ASTANA. QazAqparat - Álemdik munaı baǵasy tómendeýde, óıtkeni ınvestorlar «qara altynnyń» óndirý deńgeıin shekti deńgeıde ustap turý jónindegi kezdesýde kelisimge qol jetkizýge qatysty kúmán keltiredi, oǵan saýda-sattyq málimetteri dálel, dep habarlady RIA Novostı.

Soltústikteńizdik Brent markaly munaı qospasynyń maýsym aıyndaǵy fıýchersteri 2,21 paıyzǵa tómendep, barreli 38,96 dollar boldy, WTI  markaly munaıdyń mamyr aıyna fıýchersteri 2,46 paıyzǵa arzandap, barreli 36,82 dollardy qurady.

Budan buryn OPEK-tegi Kýveıttiń resmı ókili Naval ál-Fýzaıa 17 sáýirde Dohada ótetin kezdesýler qorytyndylary boıynsha munaı óndirýshi elder munaı óndirý kólemin aqpandaǵy deńgeıde ustap turýǵa qol jetkizedi dep málim etken bolatyn. Munaı óndirýshiler bul týraly kelisimge kelissózderge Irannyń qatysýynsyz-aq qol jetkizýi múmkin ekenin málimdegen bolatyn.

Sonymen qatar ol munaı óndirýdi ustap turý onyń baǵasynyń ósýine ákep soqtyrady dep atap ótti. Munaı baǵasy jyl sońyna qaraı barreli 45-60 dollarǵa jetedi, dep sanaıdy ol.

«OPEK-tegi Kýveıt resmı ókili kelisim Irannyń qatysýynsyz bolýy múmkin degenmen, Irannyń, Iraktyń jáne Lıvııanyń kelisimge qatyspaýy fızıkalyq balansqa shekteýli túrde ǵana yqpal etedi. Óıtkeni munaıdyń qosymsha kózin negizinen osy úsh óndirýshiler  óndiredi. Sondyqtan da kúmándi máseleler sol kúıinde qalyp otyr», - dep MarketWatch agenttigi Credit Suisse taldamashylarynyń sózin keltiredi.