Brazılııanyń Joǵarǵy soty janynda jarylys boldy

<p>ASTANA.KAZINFORM - Sársenbi kúni Brazılııa ortalyǵyndaǵy Joǵarǵy sot ǵımaratynyń janynda jarylys boldy. Sot qyzmetkerleri evakýatsııalanyp, onyń aldyndaǵy alańnan er adamnyń máıiti tabyldy, dep jazady <a href="https://www.bbc.com/russian/articles/ckg7960dy0do" target="_blank" rel="noopener">BBC</a>.</p>

Birinshi jarylys sot ǵımaratyna irgeles turǵan avtoturaqtaǵy kóliktiń júksalǵyshynda boldy, al 20 sekýndtan keıin ekinshi jarylys estildi.

Ǵımarat aldyndaǵy alańnan er adamnyń máıiti tabyldy. Bılik ókilderiniń aıtýynsha, ol Joǵarǵy sotqa kirýge árekettengen.

- Bul azamat Federaldy Joǵarǵy sot ǵımaratyna kirýge áreket jasady, biraq kire almady jáne kire beriste jarylys boldy, - dedi Brazılııa gýbernatory Selına Leao jýrnalısterge.

Aldyn ala málimet boıynsha, marqum alǵashqy jarylysty da kólik turaǵynda iske qosqan.

Eldiń bas prokýrory Horhe Messıas shabýyldy aıyptap, bılik oqıǵany óz baqylaýyna alatynyna ýáde berdi.

- Men Joǵarǵy Sotqa jasalǵan shabýyldardy qatań aıyptaımyn, - dep jazdy ol "X" áleýmettik jelisinde. - Biz bul shabýyldardyń artynda kim turǵanyn bilip, beıbitshilik pen qaýipsizdikti múmkindiginshe tezirek qalpyna keltirýimiz kerek.

Joǵarǵy sot el astanasynyń ortalyǵyndaǵy Ulttyq kongress pen Brazılııa prezıdentiniń jumys rezıdentsııasy Planalto saraıynyń janynda ornalasqan.

G1 portalynyń habarlaýynsha, oqıǵa bolǵan kezde parlament ǵımaratynda depýtattar palatasy men senattyń jalpy otyrysy ótip jatqan.

Prezıdent Lýıs Inasıo Lýla da Sılva jarylysqa deıin keńsesin tastap, keshke jaqyn jerde ornalasqan óziniń resmı rezıdentsııasy Alvorada saraıynda boldy.

Buǵan deıin habarlaǵanymyzdaı, Pákistandaǵy temirjol vokzalynda bolǵan jarylys saldarynan 20-dan astam adam qaza tapty.