Brazılııalyq nokaýter Jánibek Álimhanulyn jekpe–jekke shaqyrdy

NUR-SULTAN. QazAqparat – Orta salmaqtaǵy brazılııalyq boksshy Eskıva Falkao (30-0, 20 KO) WBO álem chempıony atanǵan qazaqstandyq Jánibek Álimhanulyn (12-0, 8 KO) jekpe-jekke shaqyrdy, dep habarlaıdy QazAqparat Sports.kz siltememen.

«Qazaq stıli» laqap atymen tanymal J.Álimhanulyna E. Falkao Twitter-de jazba qaldyryp, kezdesý ótkizýdi usyndy.

«Endi sen naǵyz chempıon atanǵan kezde beldigińdi tartyp ala alamyn. Kettik, chempıon», — dep jazǵan ol postta Top Rank promoýterlik kompanııasynyń akkaýntyn belgiledi.

Oǵan qazaq boksshysy jaýap berdi.

«Menimen jekpe–jekke shyqqyń kelse, aldymen chempıon bolýyń kerek. Sonda ǵana sóılesermiz. Maǵan chempıondyq ataǵy joq boksshylar qyzyq emes. Men seni qurmetteımin, biraq boks áleminde seniń atyń shyqpaǵan. Men Charlomen, «Kanelomen» aıqasqa túskim keledi!», - dedi Jánibek.

Foto: instagram.com/janibek_alimkhanuly