ASTANA. KAZINFORM — Brazılııada jumys isteıtin energetıkalyq kompanııalar AQSh-tyń 50 paıyzdyq ımporttyq baj salyǵyn engizý jónindegi sheshiminen keıin munaı eksportyn ýaqytsha toqtatty. Bul týraly Reuters basylymy Brazılııa munaı-gaz ınstıtýtynyń (IBP) basshysy Roberto Ardengıdiń málimdemesine silteme jasap jazdy.
AQSh prezıdenti Donald Tramp osy aptada Brazılııadan keletin jetkizilimderge jańa tarıfter engizý týraly jarlyqqa qol qoıdy. Qujatta atalǵan sharalardyń AQSh múddesine qater tóndiretin áreketterge jaýap retinde qabyldanǵany aıtylǵan.
IBP — Brazılııada jumys isteıtin munaı-gaz sektorynyń eń iri ókilderin biriktiretin uıym. Onyń quramyna Petrobras, Shell, TotalEnergies, ExxonMobil jáne Equinor sekildi alpaýyt kompanııalar kiredi.
Agenttiktiń málimetinshe, munaı — Brazılııanyń AQSh naryǵyna eksporttaıtyn negizgi taýarlarynyń biri.
Aıta keteıik, buǵan deıin Tramp Brazılııadan keletin ımportqa kedendik baj salyǵyn 50%-ǵa deıin kótergenin jazdyq.
Jarasqan Nurybaev
Nurybaev Jarasqan Beknazaruly
1990 jyldyń 12 qańtarynda Ózbekstan Respýblıkasynda týǵan.
"Nızamı" atyndaǵy Tashkent Memlekettik Pedagogıka Ýnıversıtetiniń túlegi.
Gazet jáne telearnalarda tilshi ári telejúrgizýshi qyzmetin atqarǵan.
Birneshe Halyqaralyq aqyndar músháırasynyń júldegeri.
Qazirgi tańda QR Prezıdentiniń Teleradıokesheninde "Qazaqparat" HAA shyǵarýshy redaktory