Bratıslavada Qazaqstan-slovak iskerlik dóńgelek ústel otyrysy ótedi

NUR-SULTAN. QazAqparat - Bratıslava qalasynda Qazaqstan-slovak iskerlik «dóńgelek ústel» otyrysy ótedi. Bul týraly búgin ótken brıfıngte QR Syrtqy ister mınıstrliginiń resmı ókili Aıbek Smadııarov aıtty, dep habarlaıdy QazAqparat tilshisi.

Bratıslavada Qazaqstan-slovak iskerlik dóńgelek ústeli ótedi

«21 qańtarda Slovakııanyń Bratıslava qalasynda Qazaqstan-slovak iskerlik «dóńgelek ústelin» ótkizý josparlanýda. Bul is-sharaǵa memlekettik organdar, kvazımemlekettik sektor ókilderi, sondaı-aq eki eldiń iri bıznes ókilderi qatysady», - dedi ol.

Resmı ókildiń atap ótýinshe, atalǵan shara barysynda saýda-ekonomıkalyq jáne ǵylymı-tehnıkalyq yntymaqtastyq jónindegi Qazaqstan-Slovakııa úkimetaralyq komıssııasynyń 8-shi otyrysy ótip, eki el ekonomıkasynyń túrli salalaryndaǵy yntymaqtastyǵy máselelerin talqylaý josparlanýda. Bıznes-forýmǵa energetıka, qaýipsizdik jáne qorǵanys ónerkásibi, ınjınırıng jáne tamaq ónerkásibi, aqparattyq-kommýnıkatsııalyq tehnologııalar, metrologııa jáne gıdrologııa jáne basqa da salalarda jumys isteıtin 20-dan astam slovak kompanııasynyń ókilderi qatysady.

«Slovak seriktesterimen yntymaqtastyqqa múddeli qazaqstandyq kompanııalar is-sharaǵa qatysýǵa shaqyrylady. Qatysý máseleleri boıynsha «Kazakh Invest» Ulttyq kompanııasy» AQ-ǵa habarlasýǵa bolady», - dedi Aıbek Smadııarov.