Brakonerlerge qarsy «Bekire» aktsııasyna 1200 qyzmetker tartylady
Balyq sharýashylyǵy komıteti tóraǵasynyń orynbasary Aıan Bahııanovtyń málimetinshe, keshe, 1 sáýirde Atyraý, Mańǵystaý jáne Batys Qazaqstan oblystarynda «Bekire-2023» keń aýqymdy balyq qorǵaý aktsııasy bastaldy. Brakonerlerge qarsy aktsııaǵa 1 200 qyzmetker tartylady.
«Bul aktsııa – bekire tuqymdas balyqtar resýrsyn ýyldyryq shashý kezeńinde qorǵaý úshin kúsheıtilgen is-shara. Keń aýqymdy aktsııa bekire jáne basqa da balyq túrlerin saqtaý, onyń kóbeıýine jol ashý maqsatyn kózdeıdi. Bıyl negizgi kúshter Kaspıı teńiziniń jaǵalaýy men akvatorııasyna jáne Atyraý oblysy shegindegi Jaıyq jáne Qıǵash ózenderiniń sý aıdyndarynda shoǵyrlanady.
«Bekire» aktsııasy kezinde batystaǵy úsh oblystyń aýmaǵynda tabıǵat qorǵaý is-sharalaryna quqyq jáne tabıǵat qorǵaý organdarynyń 1 203 qyzmetkeri tartylady. Onyń ishinde 822 qyzmetker Atyraý oblysynda qyzmet atqarady. Olar 66 qaıyq jáne shaǵyn júzý quraldarymen, sonymen qatar 145 avtokólikpen qamtamasyz etiledi. Jaıyq ózeniniń jaǵalaýynda balyq aýlaý zańnamasyn buzýshylyqty tirkeıtin 17 beınekamera jumys isteıdi. Al, shekara qyzmeti úsh jaǵalaýdaǵy radıolokatsııalyq stantsııany iske qosady», - dep málim etti Aıan Bahııanov.
Onyń aıtýynsha, ótken jyldardaǵy balyq qorǵaý aktsııasynyń nátıjeleri kóktemgi naýqan kezeńinde brakonerlik toptardyń qyzmeti jandana túskenin kórsetken. Máselen, «Bekire-2021» aktsııasy barysynda Atyraý oblysynyń aýmaǵynda 952 zań buzýshylyq anyqtalǵan. Al, byltyr kórsetkish 820 zań buzýshylyq tirkelgen.
Eske sala ketelik, buǵan deıin elimizdiń batysynda «Bekire» balyq qorǵaý aktsııasy bastalǵanyn jazǵan edik.