Brakonerlerdi ustaý barysynda kóz jumǵan qoryqshynyń otbasyna memlekettik nagrada tabys etildi

QYZYLORDA. QazAqparat - Qyzylorda oblysy Jalaǵash aýdanynda tabıǵat baılyǵyn qorǵaý jolynda mert bolǵan qoryqshy Ádil Kenjeǵulovtyń otbasyna QR Prezıdenti Jarlyǵymen berilgen ІІ dárejeli «Aıbyn» ordeni tabys etildi, dep habarlaıdy QazAqparat tilshisi óńirlik kommýnıkatsııalar qyzmetine silteme jasap.

Ordendi Qasym-Jomart Toqaevtyń tapsyrmasymen Syr óńirine arnaıy kelgen Ekologııa, geologııa jáne tabıǵı resýrstar mınıstri Maǵzum Myrzaǵalıev marqumnyń otbasyna tabys etti.

«Ádil Kenjeǵulov ómiriniń sońǵy sátine deıin «Ohotzooprom» memlekettik kásipornynyń ınspektory qyzmetin adal atqardy. Týǵan elimizdiń tabıǵatyn qorǵaýda eńseli eńbek etti. Kezekti kezekshilik kezinde ońaı olja izdeýshilerdiń izine túsip, olardy qolǵa túsirý úshin áreket etti. Memleket basshysy osy oraıda brakonerlikti qatańdatý boıynsha naqty tapsyrma berdi. Qazirgi tańda ınspektorlardyń qyzmet barysynda quzrettiligin keńeıtý, áleýmettik jaǵdaıyn jaqsartý jáne brakonerlikke qatysty qylmystyq jazany kúsheıtý boıynsha birqatar zańnamalarǵa ózgertýler eńgiziledi»,- dedi mınıstr.

Esterińizge sala ketelik, Ádil Kenjeǵulov 25 qazan kúni kúdik týdyrǵan brakonerlerdi toqtatpaq bolǵan sátte kóz jumdy .

«Ádil Sharapatdınuly ózin naǵyz tabıǵat qorǵaýshysy, kásibine adal maman, meıirim gúlin úlken júregine oraǵan abzal azamat retinde esimizde jattalyp qaldy. Elimizge adal qyzmet jasap, beıbit kúnde batyrlyq kórsete bildi. Óziniń zamandastaryna, aǵa - inilerine óshpes ónege kórsetti»,- dedi oblys ákimi Qýanyshbek Ysqaqov.