Brakonerler Atyraý oblysynda 64 mln teńgeniń balyǵyn qamys arasyna jasyryp ketken

ATYRAÝ. QazAqparat – Atyraý oblysynda Jaıyq ózeniniń Kaspııge quıar saǵasynda qamys arasyna jasyrylǵan 62,2 keli bekire tabyldy. Balyq qoryna 64 mln 377 myń teńgeniń zalaly kelgen, dep habarlaıdy QazAqparat tilshisi.

Balyq sharýashylyǵy komıtetiniń baspasóz qyzmetinen málim etkendeı, bekire tuqymdas baǵaly balyq búgin, 19 mamyrda saǵat 11:00-de tabylǵan.

«Elimizdiń batys óńirindegi úsh oblystyń sý aıdyndarynda «Bekire – 2023» keń aýqymdy balyq qorǵaý aktsııasy ótkizilip jatyr. Atalǵan aktsııa aıasynda Jaıyq-Kaspıı oblysaralyq balyq sharýashylyǵy basseındik ınspektsııasy men Atyraý oblysy Polıtsııa departamentiniń qyzmetkerleri Jaıyq ózeniniń Kaspıı teńizine quıatyn saǵasynda reıd sharalaryn ótkizdi.

Reıd kezinde Jaıyq ózeniniń jaǵalaýyndaǵy qamys arasynan 62,2 keli bekire tabyldy. Brakonerler bekireni 3 qapqa salyp jasyrǵan», - dep habarlady komıtettiń baspasóz qyzmetinen.

Atalǵan fakti QR Qylmystyq kodeksiniń 339-baby 1-bóliginiń belgilerimen Sotqa deıingi tergep-tekserýdiń biryńǵaı tizilimine tirkeldi.

Aldyn ala málimetke sáıkes balyq resýrstaryna keltirilgen zalal mólsheri 64 mln 377 myń teńgeni quraıdy.

Eske sala ketelik, budan buryn brakonerler Jaıyq jaǵasyndaǵy qamysqa 36 kelige jýyq bekire tyǵyp ketkenin jazǵan edik. Keltirilgen zalal – 18 mln 578 myń teńge.

Keıin meıramhana tońazytqyshynan 73 keli bekire tuqymdas balyq tabylǵanyn habarlaǵan bolatynbyz.