Brakoner týraly zań jobasy osy aıda Parlamentke engiziledi
«Brakonerlik qylmys úshin jaýapkershilikti kúsheıtý kerek. Qazirgi ýaqytta brakonerlik uıymdasqan qylmys sıpatyn alyp, tabıǵatty qorǵaý týraly zańnamanyń óreskel buzylý faktileri jyl saıyn kóbeımese, azaıatyn emes. Bıyl tirkelgen «Ohotzopromnyń» eki ınspektorynyń ólimi, Marqakóldegi brakonerlerdiń qylmystyq áreketteri, Kaspıı teńizindegi bekire tuqymdas balyqtarǵa jasalǵan brakonerlik osy sózimizge aıqyn dálel bola alady. Osyǵan baılanysty, Memleket basshysy brakonerlik úshin jaýapkershilikti kúsheıtý úshin naqty sharalardy qolǵa alýdy tapsyrdy», - dedi Qazaqstan Respýblıkasynyń ekologııa, geologııa jáne tabıǵı resýrstar mınıstri Maǵzum Myrzaǵalıev vedomstvoda ótken alqa otyrysta.
Mınıstrdiń aıtýyna qaraǵanda, atalǵan baǵytta jumys bastalyp ketken. ıAǵnı, brakonerlik maqsatta paıdalanylǵan qarýlardy, kerek-jaraqtardy mindetti túrde tárkileý erejeleri zańnamaǵa ózgeris retinde engizilgeli otyr.
«Sol sekildi, brakonerlik úshin sanktsııa kúsheıtildi. Inspektorlardyń ósimdik jáne janýarlar álemin qorǵaý baǵytyndaǵy quzireti artty. Sonymen qatar, mınıstrlik Bas prokýratýramen jáne ózge de jaýapty organdarmen birge brakonerlikpen kúresti kúsheıtý sharalaryn qolǵa alýda. Bul rette qyzmettik boryshyn óteý kezinde qoryqshylardyń nemese olardyń týystarynyń ómirine qastandyq jasaý qylmysyna sanktsııalar kúsheıtildi», - dedi ol.
Maǵzum Myrzaǵalıev bul usynystar Bas prokýratýranyń janyndaǵy quqyqtyq saıasat jónindegi keńeste qoldaý tapqanyn baıan etti.
«Májiliske zań jobasy osy aıda engiziledi», - dedi mınıstr.