Brainlab júıesi: Semeıde mıynda isik bar patsıentke kúrdeli ota jasaldy

ASTANA. QazAqparat - Qyryq bes jastaǵy Semeı turǵynyna mı isigi dıagnoz qoıylyp, medıtsınalyq saqtandyrý júıesiniń qarajaty esebinen ony alyp tastaý boıynsha kúrdeli operatsııa jasaldy, dep habarlaıdy QR DSM baspasóz qyzmeti.

Ol dárigerlerge qurysýlar týraly shaǵymdarmen júgindi. Óz emhanasynda patsıent egjeı-tegjeıli zerttep-qaraýǵa jiberildi, joldama boıynsha ol mıdyń kompıýterlik tomografııasynan (KT) jáne magnıttik-rezonanstyq tomografııasynan (MRT) ótti.«Patsıent Semeı qalasynyń SMKA neırohırýrgııa bólimshesine emdeýge jatqyzyldy. KT jáne MRT nátıjelerin alǵannan keıin sol jaq aldyńǵy mańdaıdyń isigi anyqtaldy. Ári qaraı biz operatsııa aldyndaǵy daıyndyqty júrgizdik jáne BrainLab neıronavıgatsııalyq júıesimen bas súıegine súıek-plastıkalyq trepanatsııa jasadyq, isikti alyp tastadyq. Operatsııadan keıin patsıent ózin jaqsy sezinedi, jaǵdaıy turaqty», — dep atap ótti neırohırýrg dáriger Tóleýǵalı Qoıshybaev.

Esterińizge sala keteıik, MÁMS engizýmen KT jáne MRT qazaqstandyqtar úshin odan da qoljetimdi boldy. Patsıentterge ýchaskelik dárigerden zerttep-qaraýǵa joldama alý jetkilikti.
Búgingi tańda MÁMS-tegi kez kelgen saqtandyrylǵan adam qymbat KT jáne MRT zertteýlerin tegin ala alady. Máselen, eger 2019 jyly saqtandyrý medıtsınasy engizilgenge deıin emhanalar arqyly 200 myńǵa jýyq KT jáne MRT qyzmetteri kórsetilse, ótken jyly qazaqstandyqtar 1 mln. 400 myń sessııa ótti, ıaǵnı 7 ese kóp.
Sondaı-aq saqtandyrý qarajaty esebinen osy patsıentke qatysty sııaqty joǵary tehnologııalyq, qymbat zerttep-qaraýlar men operatsııalar júrgizýge bolady.