Bir jylda ınflıatsııa 8,4% boldy: Ásirese tarıfter 43 paıyzǵa deıin ósip ketken

<p>ASTANA. KAZINFORM — 2024 jylǵy maýsymda tutyný baǵalarynyń aılyq ındeksi 0,4% boldy (ótken aıdaǵydaı). Azyq-túlikke jatpaıtyn taýarlar men aqyly qyzmetterdiń baǵasy 0,6% ósti. Azyq-túlik taýarlary baǵasynyń ındeksi — 100%. Bul jaıynda ulttyq statbıýrodan habarlandy.</p>

Maýsymda baǵanyń ósýi as úı plıtasyna — 8,4%, aýa baptaǵyshqa — 4,6%, kir jýatyn mashınaǵa 4% baıqaldy.

Jıhaz jáne úıge qajet zattar — 1,7%, kıim jáne aıaq kıim — 0,9%, toqyma buıymdary, jeke paıdalanýǵa arnalǵan taýarlar 0,5%-dan qymbattady.

Keshendi demalysty uıymdastyrý boıynsha qyzmet baǵasy 13%, sanatorııler — 5,6%, balalar attraktsıondary — 4,4% ósti. 

Shashtaraz ben sulýlyq salondary — 1,9%, qoǵamdyq tamaqtaný 1% qymbattady.

Azyq-túlik ónimderinen qııar baǵasy — 18,7%, qyryqqabat — 18%, tátti burysh — 17,9%, sarymsaq — 14,9%, qyzanaq — 13,3%, lımon — 7,4% arzandady. 

Kartop baǵasy — 10,7%, júzim — 3,6%, alma — 2,1%, sábiz — 1,9% qymbattady. 

Óńirler arasynda eń joǵary aılyq ınflıatsııa Aqmola oblysynda — 1% (ortasha respýblıkalyq deńgeıden 0,6 p. t. joǵary), eń tómeni — Aqtóbe jáne Almaty oblystarynda 0,1% tirkeldi.

Óńirler bólinisinde eń joǵary azyq-túlik baǵasy Mańǵystaý oblysynda 0,8%, azyq-túlikke jatpaıtyn taýarlar — Túrkistan oblysynda 2%, aqyly qyzmetter — Aqmola jáne Batys Qazaqstan oblystarynda tıisinshe 2,5% jáne 2,6% ósti.

2024 jylǵy maýsymda jyldyq mánde ınflıatsııa deńgeıi — 8,4% boldy.

Aqyly qyzmetter — 13,8%, azyq-túlik emes taýarlar — 7,4%, azyq-túlik taýarlarynyń baǵasy 5,4% ósti.

2023 jylǵy maýsymmen salystyrǵanda tarıfter sý burýǵa — 43,5%, sýyq sýǵa — 36,7%, ortalyqtandyrylǵan jylytýǵa — 33%, elektr energııasyna — 31,7%, qoqys shyǵarýǵa — 30,7%, ystyq sýǵa — 30,4% ósti. 

Atsetılsalıtsıl qyshqylynyń baǵasy — 60,8%, belsendirilgen kómirge — 33,1%, hılak fortege — 24,7%, paratsetamolǵa — 23% ósti.

Júzim — 29%, qyzylsha — 24,9%, záıtún maıy — 21,3%, qyzanaq — 19,8%, banan — 18,5% qymbattady. 

Kerisinshe jyldyq mánde pııaz — 40,4%, qaraqumyq jarmasy — 23,1%, kúnbaǵys maıy — 22,3%, qyryqqabat — 22,1%, qumsheker 5,6% arzandady.

Inflıatsııa deńgeıin sıpattaıtyn tutyný baǵalary ındeksiniń kórsetkishi aı saıyn esepteledi.

Baqylaý qyzmetter men taýarlardyń tarıfi men baǵasy — barlyǵy 508 pozıtsııa boıynsha júrgiziledi.

Inflıatsııa boıynsha dınamıkalyq ózgeristerdi 2018 jyldan bastap kórsetkishter qamtylǵan arnaıy ázirlengen ınteraktıvti dashbordta kórýge bolady.

Aıta keteıik, 2024 jylǵy qańtardan bastap tutyný baǵalarynyń ındeksin eseptegende azyq-túlik taýarlarynyń úlesi — 42%, azyq-túlikke jatpaıtyn taýarlar — 29,8%, aqyly qyzmetter — 28,2% boldy.