Bir jylda dári-dármektiń baǵasy qanshalyqty ózgerdi
«2023 jyly dárilik zattardyń baǵasy 2022 jylmen salystyrǵanda orta eseppen 13,6 paıyzǵa óskenin kórsetti, biraq belgilengen shekti baǵadan aspaıdy. Jalpy, bul kórsetkish maýsymdyq baǵanyń ósýine baılanysty dári-dármektiń saýda ataýlarynyń az mólsherinen turady. Negizinen, antıpıretıkalyq, vırýsqa qarsy, antıbıotıkter men antıkoagýlıanttar baǵasynyń ósýi baıqaldy», - delingen Densaýlyq saqtaý mınıstrliginiń Kazinform agenttigine bergen jaýabynda.
«Halyq densaýlyǵy jáne densaýlyq saqtaý júıesi týraly» Kodeksiniń 245-baby 2-tarmaǵyna sáıkes ýákiletti organ jartyjyldyqta bir ret monopolııaǵa qarsy organmen kelisý boıynsha baǵalyq retteýge jatatyn, bólshek jáne kóterme saýdada ótkizýge arnalǵan dárilik zattyń saýdalyq ataýyna shekti baǵalardy bekitedi. Qazirgi kezde Densaýlyq saqtaý mınıstriniń 2023 jylǵy 3 shildedegi buıryǵymen bólshek jáne kóterme saýdada ótkizý úshin dárilik zattardyń 6 890 saýdalyq ataýyna shekti baǵalar bekitildi.
«Dárihanalarda dári-dármek bekitilgen shekti baǵadan tómen baǵada satylýy múmkin ekenin aıta ketken jón. Biraq Qazaqstan Respýblıkasynyń «Halyq densaýlyǵy jáne densaýlyq saqtaý júıesi týraly» Kodeksiniń 245-babynyń 7-tarmaǵyna sáıkes, baǵalyq retteýge jatatyn tizbege engen dárilik zattardy shekti baǵasynan joǵary kóterme jáne bólshek saýdada ótkizýge jol berilmeıdi. QR Ákimshilik quqyq buzýshylyq týraly kodeksiniń 426-babyna sáıkes, dári-dármekti bekitilgen shekti baǵadan asyra satqany úshin jaýapkershilik kózdelgen. Sonymen qatar, shekti baǵadan asyra satý faktisi anyqtalǵan jaǵdaıda, Medıtsınalyq jáne farmatsevtıkalyq baqylaý komıtetiniń aýmaqtyq departamentterine dáleldi qujattarmen (dári-dármek jáne satý túbirtegimen) nemese DARIKZ mobıldi qosymshasy arqyly ótinish qaldyrýǵa bolady», - dep atalyp ótken habarlamada.
Atap aıtqanda, 2022-2023 jyldary preparattardyń baǵasyn baqylaý aıasynda dárilik zattar men medıtsınalyq buıymdardyń shekti baǵasynan asyp ketýdiń 16 faktisi anyqtaldy, 2,1 mıllıon teńgeden astam aıyppul salyndy.